LEWE NA APARTHEID: LIDMATE SE NARRATIEWE VANUIT 'N ...

Hoofstuk 2: Die oorsprong van die apartheidsverhaal
p113
Weingarten gebruik aanvanklik hierdie twee-by-twee rooster om haar eie situasie as
kind in die huis te beskryf. Haar ma was terminaal siek aan kanker en haar pa en die
dokter het besluit om nie vir haar ma te vertel hoe ernstig die situasie was nie. Sy
beskryf dan haar ma as een wat vasgevang is in die swart kwadrant. Sy was onbewus
van die erns van die siekte en boonop ontmagtig om enigiets aan die saak te doen.
Sy beskryf haarself as synde in die geel blok: deeglik bewus van die situasie, maar
ontmagtig deur die keuse van haar pa en die kenner, die dokter. Hierdie twee was
beide bemagtig en bewus (die groen blok), maar sy het hulle gesien as bemagtig maar
onbewus (die rooi blok) van die impak van hulle keuse. Hulle bly bemagtig, “creating
the most painful circumstances of my adult life to that point" (Weingarten 2000:396).
Die getuie-posisie wat elke persoon inneem word dus bepaal deur die persoon se eie
belewenis van mag en kennis met betrekking tot 'n spesifieke situasie. Elke sodanige
posisie skep gevolge vir die individu, die familie en die gemeenskap (Weingarten
2000:397). Elke persoon se mate van kennis en mag vra na 'n bepaalde reaksie of
gedrag. Dis hierdie reaksies by wit Afrikaanse Christene wat in hierdie navorsing onder
die soeklig kom. Hoeveel het die mede-navorsers werklik geweet van (die effek van)
apartheid en wat was hulle by magte om daaraan te doen? En wat het hulle destyds
gedoen en wat doen hulle tans?
Die laaste afdeling van hoofstuk twee word aan verandering gewy. Eers kyk ons na
Bridges en Mitchell (2000) se drie-fase model en daarna na Rendle (2007) se
voorstelling van die proses waardeur mense gaan tydens verandering.
7. Die proses van verandering
Ten spyte van hierdie betrokkenheid by en goeie gesindheid teenoor
swart mense, het ek jare lank nooit die sosiaal-politieke sisteem
bevraagteken nie (Müller 2000a:23).
Die nuwe Suid-Afrika is 'n veranderde situasie. Die ou bekende wêreld van apartheid-
Suid-Afrika is vir altyd verby. Dis asof die hele wêreld verander het en die uitdaging is
vir almal in die land om hierby aan te pas. Die verandering is 'n gegewe waarby wit
Afrikaanse Christene sal moet aanpas. Die wyse waarop hulle dit doen, is deel van die