LEWE NA APARTHEID: LIDMATE SE NARRATIEWE VANUIT 'N ...

Hoofstuk 3: Die verhaal oor apartheid – verlede tyd
p158
godsdiens, hulle land en hulle manier van leef was genoeg om hulle blind te maak vir
die onderliggende ontevredenheid van swart mense wat gemaak het dat hulle hulp van
enigeen gesoek het, selfs van die kommuniste. Wit Suid-Afrikaners was so behep met
die bevegting van kommunisme dat hulle die legitieme besware van
swartmense... teen die stelsel... van die tafel afgevee [Albert
4-592] het. Toe Treurnicht (1985:5) die beleid van apartheid teen die Nasionale
Instituut vir Versoening verdedig het, het hy sy hele verdediging gebaseer op die
bedreiging van kommunisme. Vir die geregverdigde besware en behoeftes van swart
mense het hy geen begrip getoon nie.
Tydens die Rivonia-verhoor sê Nelson Mandela (1964) “At the outset, I
want to say that the suggestion made by the State in its opening that the
struggle in South Africa is under the influence of foreigners or
communists is wholly incorrect… It is true that there has often been
close co-operation between the ANC and the Communist Party. But cooperation
is merely proof of a common goal – in this case the removal of
white supremacy…”
Hy motiveer hierdie standpunt van hom later as hy verwys na lande
soos Maleisië, Algerië en Indonesië wat elkeen ook ʼn bevrydingstryd
gehad het waarin die kommuniste ʼn rol gespeel het, sonder dat die
lande uiteindelik kommunisties geword het. Hy verwys ook na die
Sjinese generaal Chiang Kai-Sjek “today one of the bitterest enemies of
communism” wat saam met die kommuniste geveg het teen die
heersersklas in ʼn stryd wat gelei het tot die verkryging van mag in die
1930’s.
Die presiese omvang van die kommunistiese bedreiging en die invloed van Moskou op
die swart weerstand teen apartheid val buite die omvang van hierdie studie. Wat wel uit
die gesprekke met die mede-navorsers en uit die algemene literatuur vasgestel kan
word, is dat wit mense oortuig was van hierdie bedreiging en geglo het dat dit die rede
vir swart mense se verset teen apartheid was.