LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p281
het hierdie selfde tema aangeraak as sy vertel van haar vriendin wat met haar praat
oor Mandela:
Hy het in versoening uitgereik na wittes, hy het uit sy pad gegaan om te
vergewe – en wat kry hy? Mense aanvaar slegs hóm, sien slegs na
hóm op, terwyl sy mense verontagsaam word. Mandela wil vir die
wêreld dit benadruk dat hy nie ʼn uitsondering is nie: Ek is deel van my
mense ek is soos hulle. As julle beïndruk is deur my, moet julle ook
deur hulle beïndruk wees. As ek uitsonderlik is, is hulle ook. Maar
wittes prys voortdurend vir Mandela, terwyl hulle swartes behandel
soos voorheen.
Die uitdaging vir wit Afrikaanse Christene is om verby die hoëprofiel swart mense – met
wie hulle nooit skouers skuur nie – te kyk en swart mense met wie hulle daaglike
kontak het as gelyke te beskou. Sommige, soos Elsa, het reeds so ʼn besluit geneem
toe sy sê ek wil nie ʼn rassis wees nie [2-556]. Baie ander mense het nog nie
daardie wilsbesluit geneem nie [Hanlie 2-566].
ʼn Tipiese voorbeeld van iemand wat reeds so ʼn keuse gemaak het en daarop reageer,
is Barend la Grange, een van die sogenaamde “Dulux-3” (Retief 2012:elektroniese
bron). Dit is ʼn term wat Hanlie Retief gemunt het waarmee sy verwys na die drie manne
wat al drie met verf hulle beswaar teen The Spear wou uitdruk. In die plaaslike konteks
is dit duidelik herkenbaar as ʼn parodie op soortgelyke name uit die apartheidsera soos
die Pepco Drie (TRC 1996:elektroniese bron) en die Cradock Vier (Forbes
2010:elektroniese bron).
La Grange is die man wat die skildery The Spear met rooi verf toegetakel het. Hy
verduidelik sy optrede: “...as Afrikanerman het ek geroepe gevoel. Ons, gestereotipeer
as die groot rassiste, het ’n verantwoordelikheid om daardie persepsie om te keer.” Self
al sou die hof oor die skildery oordeel, sê hy, “dan gaan swart mense steeds sê: ‘Die
wittes respekteer ons nie.’ So dit was die régte ding dat ’n wit man van die skildery
ontslae raak” (Retief 2012:elektroniese bron).