LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p329
is dié navorsing van groot waarde vir die praktiese teologie.
Hierdie navorsing kan vir die NG Kerk van waarde wees. Die gebrek aan insig in die
effek van apartheid, moet vir die Kerk ʼn kritiese element wees vir die strategiese
bedieningspraktyk. Die NG Kerk loop die risiko dat sy amptelike besluite al hoe verder
verwyderd kan raak van die lidmate. Om dit teë te werk, sal lidmate al meer betrokke
gemaak moet word by van die besluite van die Kerk.
My eie bydrae aan die NG Kerk sou kon wees in die vorm van ʼn akademiese artikel
waarin hierdie navorsing aan ʼn breër leserspubliek bekendgestel word. Van selfs nog
meer praktiese waarde sou ʼn aantal populêre artikels wees in tydskrifte of koerante wat
deur die lidmate van die Kerk gelees word.
12.2 Beperkings
Geen navorsing van hierdie omvang is sonder tekorte nie. Ter wille van deursigtigheid
en ter wille van toekomstige navorsers, word ʼn aantal faktore kortlike uitgelig.
Die samestelling van die groep bepaal uiteraard wat gedoen kan word. Die medenavorsers
vir hierdie studie was almal van ʼn bepaalde ouderdom en uit ʼn sekere
sosiale vlak. Dit was ʼn doelbewuste keuse, maar ander groepe sou dalk ander
narratiewe gelewer het. So sou ʼn soortgelyke ondersoek met baie jonger medenavorsers
ʼn heel ander stel verhale op tafel plaas. Hiermee saam kan ook gevra word
of die opvolgnavorsing nie meer effektief sou gewees het as dit in groepsverband
plaasgevind het nie.
Die keuse vir die tydperk van veertien jaar sou ook anders gekies kon word. ʼn
Soortgelyke studie sou byvoorbeeld na die volgende Algemene Sinode gedoen kon
word waarin die volgende rondte oor Belhar verreken sou kon word. Die sogenaamde
nuwe Suid-Afrika is nie eenduidig nie. Daar is verskillende fases waardeur die land al
gegaan het, en nog sal gaan. Op ʼn politieke vlak kan verwys word na die tydperke van
die verskillende presidente. Op kerklike terrein vermoed ek sal die rol van Belydenis
van Belhar ook nog duidelike tydperke aandui. Daar sou moontlik in die toekoms ook
ander dramatiese gebeure kon wees wat sinvolle afsnydatums vir verdere navorsing
sou kon bied.