LEWE NA APARTHEID: LIDMATE SE NARRATIEWE VANUIT 'N ...

Hoofstuk 4: Die verhaal oor apartheid – teenswoordige tyd
p177
3. Metodologie
Soos in hoofstuk een verduidelik is, is die navorsing gebou op onderhoude met ʼn groep
wit Afrikaanse Christene in Welkom. Die aanvanklike navorsing is in 1998 gedoen en
wel in groepsverband. ʼn Reeks van agt groepsgesprekke is gevoer waarby die meeste
van die mede-navorsers elke keer teenwoordig was. Die resultate van daardie
navorsing is in hoofstuk drie aan die orde gestel.
Die ideaal sou wees om ook vir die opvolgnavorsing in 2012 só ʼn reeks groepsgesprekke
te kon hou. Bepaalde praktiese faktore het dit onmoontlik gemaak. Die
grootste hiervan is dat ʼn beduidende aantal van die mede-navorsers nie meer in
Welkom woon nie. Die oudste van die groep, Ben, is ook sedertdien oorlede. In plaas
van groepsgesprekke is daar besluit om ʼn reeks persoonlike gesprekke te voer. Die
meeste mede-navorsers het as egpare aan die aanvanklike rondte deelgeneem en
daarom is die opvolggesprekke met hulle as egpare gevoer. Met drie van die medenavorsers
(Hanlie, Isak en George) is die gesprekke in ʼn een-tot-een situasie gevoer.
Op een uitsondering na is almal in hulle huise ontmoet vir die gesprekke. Die een
uitsondering (George) het van Odendaalsrus gekom en my tuis kom sien. Ten einde by
almal uit te kom, het ek tydens my vakansie tyd ingeruim om Elsa en Frans in
Malmesbury te gaan besoek. Ek het ook een naweek spesiaal Prieska toe gery om met
Mike en Naomi te gaan praat.
Soos met die aanvanklike navorsing is die gesprekke met die toestemming van die
mede-navorsers opgeneem en later getranskribeer. Hierdie sewe transkripsies word as
Bylaag 9 tot 15 in elektroniese formaat by hierdie navorsingsverslag aangeheg.
Ek het ook ʼn oop uitnodiging gerig aan die mede-navorsers om hulle reaksies op
bepaalde vrae op skrif te sit. Drie van hulle (Isak, Johan en Karin) het daarop
gereageer. Hierdie drie skriftelike bydraes word as Bylaag 16 tot 18 ook in elektroniese
formaat aangeheg.
Alle aanhalings uit die mede-navorsers se bydraes word weereens in ʼn ander
lettertipe aangedui. Alle aanhalings is voorsien van die gebruiklike verwysing in
vierkantige hakkies, byvoorbeeld [Frans 9-123]. Die gebruik van hierdie verwysings is
in hoofstuk een verduidelik.