LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p302
In die apartheid-konteks is hierdie ʼn belangrike insig. Die benadeling van swart mense
het nie net te make gehad met ekonomiese en ander diskriminasie nie, maar dit het
(veral) ook gelê op die vlak van minagting van die benadeelde as persoon. In die
versoeningsproses sal beslis hieraan aandag gegee moet word.
Die proses van versoening is primêr ʼn taak van die kerk. In die lig van 2 Korintiërs 5:19
(“Die boodskap van versoening bestaan daarin dat God deur Christus die wêreld met
Homself versoen het en die mense hulle oortredinge nie toereken nie. Die boodskap
van versoening het Hy aan ons toevertrou”) het die kerk as instituut die uitdaging om
die versoening met God wat reeds bewerk is, ook sigbaar te maak tussen gelowiges. In
hierdie sigbaarmaking van die versoening moet die kerk ʼn voorbeeld stel. Hieronder
word ʼn aantal aspekte daarvan uitgelig. Die kerk sal ook die boodskap van restitusie as
deel van versoening aan lidmate moet verkondig.
8.1 Versoening: Kerk as instituut moet voorbeeld stel
Die NG Kerk as instituut het reeds skuld bely oor apartheid. Die uitdaging is nou om die
lidmate saam te neem op die pad na konkretisering van hierdie belydenis. Sonder dade
sou, soos Jakobus sou sê, hierdie belydenis leë woorde wees. “The DRC evidently
found it difficult to really and wholeheartedly confront its apartheid past” (Meiring
2003a:254).
Die WVK se verslag verwys ook na die kerke se unieke posisie in die Suid-Afrikaanse
samelewing en die geleentheid wat dit skep vir versoening:
Faith communities enjoy a unique and privileged position in South
African society. They are widely respected and have far-reaching moral
influence. As such, they should play a key role in healing and
reconciliation initiatives (TRC 1998a:316).
Wanneer gekyk word na die rol van die NG Kerk, is daar veral drie aspekte wat
aangespreek moet word. Die NG Kerk as instituut moet as konkretisering van
versoening die eenheidsproses met die ander lede van die NG Kerkfamilie finaliseer;
die Kerk moet die lidmate pastoraal begelei ten opsigte van sake uit die verlede en die
Kerk moet die lidmate begelei op die pad vorentoe.