LEWE NA APARTHEID: LIDMATE SE NARRATIEWE VANUIT 'N ...

Hoofstuk 4: Die verhaal oor apartheid – teenswoordige tyd
p228
4.5.1 Die NG Kerk in apartheid Suid-Afrika
In die heel eerste gesprek het Frans [1-459] sy frustrasie met die NG Kerk uitgespreek
oor die verandering van standpunt oor apartheid:
...nou voel dit vir my die kerk het 'n 180 grade
draai gemaak. En alles gefundeer uit die Woord van
God uit. En dit is my dilemma ek kan eenvoudig nie
die kloutjie by die oor kry nie. 'n Mens is nie
stupid nie, jy lees en jy hoor al hierdie goeters,
maar dit voel vir my ons het geblinddoek deur die
lewe gegaan.
In die opvolgnavorsing het die NG Kerk nie veel beter gevaar nie. Frans [9-771] is
steeds van mening dat die Kerk nie ʼn positiewe rol speel nie. Elsa [9-782] noem dit ʼn
klub waaraan sekere groepe mense behoort wat graag soontoe wil
gaan. Danie [13-323] is selfs nog meer sinies oor die Kerk: Ag weet jy ek dink
die kerk het nie ʼn rol gespeel in die tye van apartheid nie en
die kerk speel nie ʼn rol...
Op die vraag of hulle dink dat apartheid ʼn kettery was, antwoord Johan [17-203] Nee,
maar Elsa [9-825] sê: Ek dink verseker so en dan voeg sy by: Ek het dit
nie van die kansel af gehoor nie [Elsa 9-777]. Frans [9-844] plaas die fokus
op die noue verhouding met die staat wat verhoed [het] dat die evangelie
suiwer bedien kan word. Isak [16-426] trek die lyne van die kritiek op die NG Kerk
saam as hy sê: Ek wil egter glo dat apartheid die kerk in ʼn
integriteits- en geloofwaardigheidskrisis gedompel het.
Waarnemers kan die NG Kerk se skuldbelydenis oor apartheid sien as die rede vir die
geloofwaardigheidskrisis, maar juis daarin lê die Kerk se soeke na die waarheid van die
Woord. Wat in 1986 en weer in 1990 bely is, moes al lankal gebeur het in ʼn instansie
wat volgens die Woord van God leef. Gaum (1997a:53) antwoord die kritiek dat die NG
Kerk bloot die regering napraat só: “Dit is wel so dat daar in die breë gisting van
gedagtes oor samelewingsake ʼn gelyklopendheid was, ook ʼn wisselwerking, en dat op
verskillende vlakke in die Afrikaanse gemeenskap min of meer gelyktydig tot bepaalde
oortuigings gekom is.” Hy voer ook aan dat die NG Kerk die beleidstuk Kerk en
Samelewing reeds op 6 November 1989 gefinaliseer het, amper drie maande voor