LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p272
Tydens die 2003 South African Christian Leadership Assembly word sewe
sogenaamde reuse geïdentifiseer. Dit is aktuele kwessies wat die Suid-Afrikaanse
samelewing uitdaag en selfs afbreek. Een hiervan is rassisme. Die Kerkspieël-opname
van 2006 toets die NG Kerk se houding ten opsigte van hierdie sewe sake. Die
opvallende is dat, behalwe vir seksisme, rassisme die minste aandag in die NG Kerk
kry (Bisschoff 2008:10). Blykbaar sien die wit gemeenskap nie “rassisme en seksisme
as ʼn probleem” nie (Bisschoff 2008:11). Benewens die kulturele verskille aangaande
hierdie sake is dit veral “die vrees vir die reaksie van wit lidmate dat rassisme weer
eens genoem word” en die teologiese rede dat die politieke belang vir ʼn lang tyd
“teologies gewettig” is (Bisschoff 2008:11). Dit is duidelik dat selfs onder wit Afrikaanse
Christene die ware inpak en kernprobleem van apartheid steeds nie raakgesien word
nie. Hierdie situasie het ʼn direkte impak op die transformasie en die proses van
versoening in post-apartheid Suid-Afrika.
3.5 Die gevolge van ʼn ontkenning
So lank as wat wit Afrikaanse Christene weier om te erken dat apartheid hulle
bevoordeel het ten koste van swart Suid-Afrikaners, en solank hulle nie die noodsaak
van herstel raaksien nie, sal transformasie en versoening nie na wense vorder nie.
Wit Afrikaanse Christene, wat my en die mede-navorsers insluit, was ook slagoffers
van apartheid. Nie in die sin waarin dit aangebied is in die gesprekke, naamlik dat ons
ly as gevolg van iets wat ons voorouers gedoen het nie [Danie 1-674 en Albert 1-703],
maar omdat ons ook iets van ons menswaardigheid verloor het deur dit wat ons aan
ons swart medemense gedoen het. Slagofferskap lê nie in die gevolge van
regstellende aksie nie, maar in die selftoegediende wonde van vooroordele. Hierdie
wonde genees eers wanneer die (groter) wonde van ander erken word. Die erkenning
herstel die ander se waardigheid en maak die ontmensliking ongedaan. Solank hierdie
erkenning nog ontkenning is, kan die genesing nie begin nie.
Benewens hierdie na-binne gevolge, is daar ook ʼn magdom na-buite gevolge wat die
lewe in post-apartheid Suid-Afrika uitdagend maak. Die gesprekke met die medenavorsers
het uitgewys dat ʼn groot aantal van hulle nog steeds nie heeltemal verstaan
wat apartheid aan swart mense gedoen het nie. Sommige van die redes hiervoor kan
gevind word in die effektiwiteit van apartheid om die verskillende rasse van mekaar