LEWE NA APARTHEID: LIDMATE SE NARRATIEWE VANUIT 'N ...

Hoofstuk 1: Apartheid onder die loep geneem
p42
9.3 Metodologie
Metodologie verwys na die navorser se siening oor hoe kennis oor die nagevorsde
onderwerp op die beste moontlike wyse versamel kan word (Schurink 1998:240). Die
metodes waarop die navorser uiteindelik besluit, word onder andere bepaal deur die
onderwerp wat ondersoek word asook die paradigma en epistemologie wat die
navorser kies.
In die voorafgaande paragrawe is 'n keuse gemaak vir postmoderniteit en 'n sosiale
konstruksie diskoers. In die lig van hierdie benadering word 'n keuse gemaak vir
kwalitatiewe navorsing wat volgens Payze (2001:271) goed geskik is vir die ondersoek
van sosiale prosesse, eerder as vir 'n kwantitatiewe studie. Die fokus van die navorsing
was om te bepaal hoe wit Afrikaanse Christene, gegewe hulle spesifieke verlede soos
onthul voor die WVK, in die nuwe Suid-Afrika leef.
9.3.1 Literatuurstudie
Tradisioneel begin navorsing dikwels eers met 'n literatuurstudie, maar nie altyd nie.
Hierdie navorsing begin ook nie daar nie. Soos Browning (1991) dit met sy praktykteorie-praktyk
benadering verduidelik, het hierdie ondersoek ook begin met 'n praktiese
situasie waarin die navorser en die mede-navorsers persoonlik betrokke was. Hieruit
het die behoefte ontstaan om ook te wete te kom wat ander mense oor die navorsingsonderwerp
skryf en geskryf het. Voor en tydens die reeks gesprekke is daar ’n
uitvoerige literatuurstudie oor die sienings van wit en swart mense oor die beleid van
apartheid gedoen. Dit het ingesluit die kwessies van rassisme, die vraag na wit mense
se kollektiewe of individuele skuld en aanspreeklikheid, en die gepaardgaande
restitusie soos uitgedruk in die beleid van regstellende aksie. Die literatuurstudie het
ook gefokus op die rol van die NG Kerk in die apartheidsbedeling, van die aanvanklike
teologiese regverdiging tot die ommekeer in 1986 en finaal in 1998 (Retief & Jackson
1998:1).
Die aanvanklike navorsing is in 1998 gedoen in die tyd net voor en tydens die
bekendmaking van die WVK se verslag. Die gebeure van die WVK het dus ’n groot rol
gespeel in die denke van die deelnemers op daardie tyd.