LEWE NA APARTHEID: LIDMATE SE NARRATIEWE VANUIT 'N ...

Hoofstuk 3: Die verhaal oor apartheid – verlede tyd
p157
totaal ander perspektief. Vir hulle was kommunisme ’n vennoot in hulle stryd teen
onreg en verdrukking wat hulle elke dag ervaar het.
Villa-Vicencio (1993:156) rapporteer ʼn onderhoud wat hy met Nelson
Mandela gehad het. Hy het hom onder andere uitgevra oor die alliansie
tussen die ANC en die SA Kommunistiese Party. Mandela se antwoord
was: “During World War II Roosevelt, Churchill and De Gaulle
established an alliance with Stalin in order to fight fascism. That alliance
changed the course of history. On the same basis the ANC made an
alliance with the SACP to fight racism and white domination.”
In sy biografie van Mandela haal Meredith (1997:132) vir Albert Lethuli
aan wat gesê het: “I shall work with all who are prepared to stand with
me in the struggle for liberation of our country.” Mandela (aangehaal in
Meredith 1997:133) self het ʼn soortgelyke standpunt oor die verhouding
tussen die ANC en die kommuniste: “Theoretical differences amongst
those fighting against oppression is a luxury we cannot afford…”
Ook ʼn ander rolspeler in die vryheidstryd, Govan Mbeki, sien die
Kommunistiese Party as ʼn beweging wat veg vir die armes en die
werkers, teen die ryk en die welaf, op ʼn manier waarop die kerk dit nie
naastenby gedoen het nie (Villa-Vicencio 1993:168).
Terwyl baie wit Suid-Afrikaners die kommuniste beskou het as die
grootste openbare vyand, was hulle vir die swart gemeenskap ’n
vennoot teen verdrukking.
In sy voorlegging aan die WVK verwys die leier van die Vryheidsfront, Generaal
Constand Viljoen (1997:elektroniese bron) na “the Soviet Union as the main supporter of
the ANC” en dat sake in Suid-Afrika anders sou verloop het as dit nie vir die
kommunistiese steun aan swart mense was nie. Giliomee (1996:9) se reaksie hierop in
sy kolom in die Beeld is insiggewend. Hy sê dat swart mense met dieselfde ywer sou
veg selfs al het hulle nie kommunistiese steun gehad nie.
Die kommunistiese bedreiging het ’n baie handige “vyand” daargestel waarteen die
apartheidsregering wit mense kon saamsnoer. Die vermeende bedreiging van hulle