LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p328
beperkings en verdere moontlikhede.
12.1 Terugskouend
Die bedoeling van die navorsing was om ondersoek in te stel en te rapporteer hoe wit
Afrikaanse Christene in die post-apartheid Suid-Afrika leef, gegewe hulle aandeel aan
die vorige bedeling. Die primêre fokus was op lidmate van die NG Kerk. Al het die
navorsing dus gefokus op lidmate van die NG Kerk van 'n bepaalde gemeente in
Welkom, is daar tog bepaalde temas wat binne die wit Afrikaanse Christengemeenskap
verteenwoordig word. Die aanvanklike navorsing is veertien jaar later opgevolg deur ʼn
tweede rondte navorsing.
Dit wil voorkom asof daar min verandering plaasgevind het in die verloop van veertien
jaar. Die mede-navorsers se aanvanklike posisies is grootliks behou. Die enigste
verandering het saamgeval met groter blootstelling aan swart mense op ʼn gelyke voet,
byvoorbeeld as kollegas en nie net as ondergeskiktes nie.
Dit was duidelik dat die meerderheid van die mede-navorsers nie besef het, en steeds
nie besef, wat apartheid aan die swart mense van Suid-Afrika gedoen het nie. Daarom
is daar min begrip vir die behoefte aan skulderkenning en skuldbelydenis. Hierdie
posisie is ʼn belangrike belemmering op die pad na versoening op persoonlike vlak,
maar ook binne die Kerk.
Die NG Kerk sal die skuldbelydenis konkrete gestalte moet gee ten einde die lidmate
hierin te begelei. Die aanvaarding van die Belydenis van Belhar sal hierin ʼn belangrike
rol speel. Dit blyk egter dat juis die aanvaarding van Belhar, wat die NG Kerk se
skuldbelydenis sal bevestig, vir ʼn groot deel van die Kerk juis ʼn probleem gaan wees.
Dit rede hiervoor kan juis weer terug herlei word na die gebrekkige besef van die impak
van apartheid.
Die navorsing lewer ʼn besondere bydrae om die konsep apartheid te dekonstrueer vir
wit Afrikaanse Christene. Dit is duidelik dat die verhaal wat die mede-navorsers oor
apartheid vertel het, nie die enigste verhaal is nie. Apartheid is anders as wat die
mede-navorsers gemeen het. Beide vanuit ander wit mense se perspektief, maar veral
vanuit ʼn swart perspektief, kom daar heel ander verhale na vore. Juis om hierdie rede