LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p292
“belewenis van ʼn diep gesetelde Christelike spiritualiteit.” Hy gaan voort:
Vir sommige ouer mense was dié verandering te drasties. Hulle voel
nie meer tuis in die kerk nie. Alles het ‘volksvreemd’ geword en die
‘tradisie’ word verloën. Baie van hulle het al die kerk verlaat en nog
meer sál. Vir veral jonger mense is die kerk se historiese, patriargale
politieke bagasie verstikkend. Boonop is die veranderinge hierbo net
nie ingrypend genoeg om hulle aktief aan die kerklike lewe te laat
deelneem nie.
Dit is dus duidelik dat die uitdaging wat aan die NG Kerk gestel is, groot is. Aan die een
kant is daar die meerderheid van die Kerk se lidmate wat reeds oor die ouderdom van
60 jaar is (Oosthuizen, aangehaal in Leonard 2012:elektroniese bron) en wat in
apartheid grootgeword het. Aan die ander kant is daar die tieners en skoolverlaters,
selfs jong volwassenes, wat post-apartheid leef. En dan is daar ook die ongemaklike
tussen-in groep. Aan al hierdie lidmate moet die NG Kerk leiding gee oor die lewe in
hierdie nuwe Suid-Afrika.
6.3 Die Kerk doen goed
Die indruk word soms geskep dat die NG Kerk net probleme het en nie ook
suksesverhale nie. Dit sou egter onwaar wees. Die Kerk vermag baie meer as wat
algemeen besef word, maar dis gewoonlik in stilte agter die skerms. So byvoorbeeld
vertel Danie Mouton (2008b:12) van die sukses van die NG Kerk Port Elizabeth
Sentraal wat hande gevat het met ʼn Ghanese pastoor en nou ʼn weeklikse erediens vir
Wes-Afrikane aanbied. Barnard Steyn (2008:14) vertel die suksesverhaal van “die
klein-plattelandse dorpie, Pearston” waar gelowiges oor die kleurgrens heen mekaar se
hande vat om mekaar se nood te verlig. Die gedwonge skeiding van apartheid het plek
gemaak vir ʼn nuwe “multi-kulturaliteit”.
In die meer onlangse verlede was dit die leraar van Delmas wat opgestaan het teen ʼn
groep verregse mense wat in die dorp betoog het. Hulle betoging het gevolg na die
moord op ʼn baba en ’n dagmoeder in die dorp (Pretorius & Matipa 2012:elektroniese
bron). Ds. Snyman (2012:elektroniese bron) sê die betogers het die “droom van ’n
Delmas waar regverdigheid en geregtigheid heers en verskillende groepe mekaar respekteer
en lewensruimte gun”, kom vertrap. Verskillende mense, ook kerkleiers