LEWE NA APARTHEID: LIDMATE SE NARRATIEWE VANUIT 'N ...

Hoofstuk 2: Die oorsprong van die apartheidsverhaal
p59
when someone cannot be forgiven there is no future” (Tutu 1999:117).
Sedert die aanvanklike navorsing is daar in die NG Kerk 'n voortslepende debat oor
kerkhereniging. Die NG Kerk se aanvanklike “ernstige en duidelike verbintenis tot die
herstel van een kerkverband met die ander drie kerke van die Familie” (Ned Geref Kerk
2004:elektroniese bron) en die skynbare weerstand wat mettertyd daarteen opgebou
het (Coetzee 2009:2; Pienaar 2009), vorm die verdere agtergrond waarteen die
opvolgnavorsing gedoen is. Ten nouste hieraan verbonde is die debat oor die
aanvaarding al dan nie van die Belhar-belydenis, soos duidelik word uit enkele berigte
in Kerkbode (2004, 2007 en 2009). Jansen (2009:35) vra ook die verdere vraag na die
wit kerke se bereidheid om te verenig met kerke van ander rasse. Soos hy dit stel: “it is
entirely up to these churches, once indistinguishable from the state, to decide whether
and when they will change at all.”
Die sienings van die mede-navorsers oor hierdie en ander sake is aanvanklik getoets in
ʼn reeks semi-gestruktureerde groepsgesprekke soos in hoofstuk een verduidelik is. Die
opvolgnavorsing is ongeveer veertien jaar later gedoen deur een-tot-een gesprekke en
korrespondensie.
Hierdie hoofstuk se onderafdelings lyk as volg: Na hierdie inleiding word daar in die
tweede afdeling gekyk na die agtergrond en oorsprong van die beleid van apartheid. In
aansluiting by Browning (1991) se vertrekpunt van praktyk-teorie-praktyk sal hier ook
reeds aan die mede-navorsers se eie sienings saam met dié van akademici en ander
skrywers aandag gegee word. Hier word ook gekyk na die denkklimaat waarin die
mede-navorsers grootgeword het. Die dominante stemme en diskoerse van die
apartheidstyd sal hier uitgewys word, asook die invloed wat dit op die mede-navorsers
gehad het. Daar word gekyk na wat in die tyd voor die aanvanklike navorsing geskryf is
oor die onderskeie temas wat aan die orde gestel word. Hierdie inligting vorm die
agtergrond waarteen die verhale van die mede-navorsers gesien moet word.
Die derde afdeling sluit tematies aan by die voorafgaande. Hier word weereens na
dieselfde temas as in afdeling drie gekyk, maar nou vanuit die hoek van die afgelope
veertien jaar – die tussentyd tussen die aanvanklike navorsing en die opvolg-navorsing.
Persone, gebeure en diskoerse wat ʼn belangrike rol gespeel het in hierdie tussentyd,
soos onder andere dié waarna ek reeds hierbo verwys het, kom hier aan die orde.