Actas do Seminario Internacional O futuro da memoria - Arquivos de ...

teñen unha estreita relación coa xestión documental e arquivística. Podemos
sinalar, entre outros, os principios de integridade de garantías35 e de equivalencia
de soportes. O primeiro supón considerar sempre un nivel equivalente
de garantías, con indiferenza de se o trámite é en papel ou electrónico,
mentres que o segundo, derivado do art. 45.5 LRXPAC, aínda vixente36 , comporta
diferenciar entre o acto administrativo, o documento no que se dita o
acto e o soporte (vid. nota 42). Se ben a LAE non di nada parecido, o principio
está presente en moitos dos seus artigos37 .
Intimamente conectado cos anteriores, o principio de igualdade (art. 4.b
LAE) supón que en ningún caso o uso de medios electrónicos dará lugar á
existencia de restricións ou discriminacións para os cidadáns que se relacionen
coas administracións públicas por medios non electrónicos. É un recoñecemento
da inevitable coexistencia, polo menos temporal, de documentos
híbridos, pese a que, como veremos, a LAE contén toda unha serie de disposicións
encamiñadas á transformación de soportes, algo imprescindible no
camiño cara unha auténtica Administración electrónica.
O principio de proporcionalidade (4g. LAE) entenderase como a adecuación
das esixencias legais e de seguridade, así como os datos estritamente
necesarios á natureza e circunstancias dos distintos trámites e actuacións.
Nel fundaméntase o dereito a non aportar datos e documentos que obren
en poder da Administración (art. 6.2b), dereito que ven superar de forma
cualitativa o enunciado do art. 35.f LRXPAC posto que non se limita xa a documentos
—electrónicos— senón que se refire tamén a datos, e que precisa
necesariamente do intercambio interadministrativo de uns e outros. Isto último
lévanos á cuestión da interoperabilidade que, aínda que non se incorporou
á LAE como tal principio, así é considerada por algúns autores, dado o
seu carácter transversal e de fundamental importancia (Martínez, 2009, 270-
277) 38 . E tamén a aposta polo uso de estándares abertos, rexida polo principio
de neutralidade tecnolóxica (art. 4.i LAE). Outra dimensión do principio
consiste na non esixibilidade de sinatura recoñecida na LAE (só se menciona
a avanzada), non incrementando as esixencias de seguridade ao documento
electrónico fronte ao documento en papel (Serra, 2007) 39 .
Outros principios enunciados ou contidos na LAE son o de legalidade e reserva
de lei (art.27.1 LAE), de acordo co regulamento de dereitos subxectivos
dos cidadáns e aplicable no caso de impoñérselles o uso de medios electrónicos.
Só cando ese uso sexa voluntario poderá regularse regulamentariamente,
salvo en certos casos; o de accesibilidade á información e aos servizos
por vía electrónica (art. 4.c LAE) 40 ; de simplificación administrativa
(Art.4.j); ou o de transparencia e publicidade (art. 4.k).
105