Actas do Seminario Internacional O futuro da memoria - Arquivos de ...

372
da e da mellor maneira posible, e as tecnoloxías da información e das comunicacións
amósansenos como unha eficaz ferramenta para coadxuvar na
protección do patrimonio documental, mentres os servizos baseados nestas
tecnoloxías poden contribuír a un mellor coñecemento e difusión do referido
legado sen deterioro algún do mesmo a través da Rede.
A necesidade de ver, tocar e ler o documento orixinal coa finalidade de realizar
estudos de carácter histórico pode ser substituída pola consulta virtual do
documento dixitalizado. O clásico investigador presencial, amante de revisar,
manipular e ate ulir o pergamiño e o papel antigo como parte ritual do seu estudo,
áchase en franca decadencia e en breve estará en fase de extinción, mentres
se abren paso de forma preponderante os que se interesan polo contido
dos documentos máis que polo aspecto do soporte e as súas características físicas,
que quedan para os historiadores do papel ou para as especializadas mans
dos restauradores cando procede a súa recuperación. Por iso, cando a tecnoloxía
dixital se converte nun poderoso aliado para conseguir maiores cotas de preservación
dos orixinais e para incrementar de forma exponencial a difusión coas
infinitas posibilidades que ofrece Internet, faise preciso apostar pola constante
innovación, o desenvolvemento tecnolóxico e a permanente creación de contido
dixitais que reforcen a protección do patrimonio histórico e favorezan o acceso
a distancia á información interesada. As modernas técnicas de dixitalización
ademais de obter unha copia fidedigna de cada documento, permiten o
tratamento posterior das imaxes para eliminar manchas, mellorar a súa aparencia
ou reconstruír virtualmente zonas danadas nos documentos orixinais. En definitiva,
trátase de coidar o noso patrimonio e velar pola nosa historia sen descoidar
nin obviar o actual e recente, que está marcado polas tecnoloxías máis
novas (sempre en estado futurible), nun continuo desafío que nos transporta
permanentemente do pasado ao presente inmediato e viceversa.
Neste senso, o proxecto CARMESÍ da Rexión de Murcia é un produto do
noso tempo; unha modesta contribución para conxugar preservación e difusión
de documentos, dúas finalidades antagónicas ate datas moi recentes,
un tempo próximo no que a dixitalización fíxoas concorrer para que ambas
as dúas se desenvolvan de forma sintética. Co noso proxecto perséguese a
dixitalización de fondos documentais de carácter histórico e libre acceso coa
finalidade de preservar os orixinais e facilitar a súa consulta e difusión a través
da Internet1 . O cumprimento deste obxectivo básico e principal propicia,
en realidade, a consecución simultánea de varios fins asociados2 :
1. Garántese a mellor conservación do patrimonio documental no noso
ámbito rexional, posibilitando a súa consulta en soporte dixital e preservando
os orixinais do seu continuo manexo.