Actas do Seminario Internacional O futuro da memoria - Arquivos de ...

338
O artigo 58 especifica as condicións para a destrución de documentos orixinais
en soporte papel que teñan unha copia electrónica auténtica. Esta destrución
é responsabilidade do arquivo municipal, sempre que se cumpran as
condicións especificadas e mediante un estrito control do proceso de destrución,
que debe quedar documentado cunha acta. Contémplase a posibilidade
de que a destrución sexa encomendada a terceiros, coa emisión do correspondente
certificado por parte da empresa.
En cumprimento da Ordenanza (artigo 54) os escáneres que realizan a dixitalización
de documentos, tanto no rexistro como nas oficinas ou nas empresas
contratadas para a dixitalización masiva, configuráronse de maneira
que os seus parámetros non se poidan modificar polos operadores. Os parámetros
xerais son:
❚ Todas as saídas a PDF.
❚ Resolución 200 dpi.
❚ Branco e negro e/o escala de grises (8 bits).
❚ Dobre cara.
❚ Corrección automática da imaxe: procesos automáticos de optimización
de imaxes (umbralización, reorientación, eliminación de bordes negros,
etc…) para garantir a súa lexibilidade, así como controis para asegurar
que se respecta a xeometría do orixinal en tamaños e proporcións, e no
sentido da orientación do texto ou gráfico.
❚ Multipáxina: Para documentos de varias páxinas, posibilidade de tratar
as imaxes conxuntamente.
Ao operador só se lle permitirá elixir outra opción cando se trate de fotografías
e gráficos; nese caso o escáner traballará a cor e alta resolución (300 dpi).
Para a dixitalización en rexistro/oficinas se definiu que no momento en
que o documento escaneado se incorpora á plataforma de tramitación, esta
debe solicitar o metadato de tipo de documento, ademais de gardar automaticamente
os metadatos de dixitalización. Este metadato de tipo de documento
elíxese entre os contidos nun listado, pero este listado varía segundo
a procedencia do documentos dixitalizado:
❚ Documentos presentados polos cidadáns e dixitalizados no rexistro ou
nas oficinas (véxase listado en anexo V).
❚ Documentos internos creados no tramitador polos traballadores municipais
(véxase listado en anexo VI).
❚ Tipos de documentos para o xestor de documentos corporativos (véxase
listado en anexo VII).