Actas do Seminario Internacional O futuro da memoria - Arquivos de ...

A idea que deu lugar á celebración do seminario internacional O futuro da
memoria: o patrimonio arquivístico dixital respondeu a un triplo obxectivo:
1. Dar a coñecer o Arquivo de Galicia e as súas instalacións na Cidade da
Cultura aos profesionais e subliñar o seu carácter de centro que nace con vocación
de coordinación e colaboración. 2. Subliñar o papel que o Arquivo está
chamado a xogar na planificación e no desenvolvemento da xestión documental
electrónica na Xunta de Galicia e 3. Reflexionar sobre as cuestións
asociadas co establecemento de políticas para a implantación da Administración
electrónica e de dixitalización para a conservación e a difusión do patrimonio
documental.
Nos dous últimos aspectos sinalados áchase presente o tema da conservación
da memoria dixital. É obvio que non basta con crer nas tecnoloxías da
información e da comunicación e apostar pola e-Administración e o dixital
como solución para todos os problemas da xestión das nosas organizacións
ou para a conservación do noso patrimonio documental analóxico. Os profesionais
sabemos que esas belas palabras, esas boas intencións de modernización
e transparencia das institucións públicas, de acceso rápido e universal
aos documentos, á información e á cultura, só serán iso, fermosas palabras,
se non se enmarcan en políticas concretas que se plasmen en plans e
accións deliberadas e continuadas no tempo. Políticas, plans e accións que
partan dunha clara conciencia da inestabilidade e, por tanto, vulnerabilidade
da información electrónica. A formación desa conciencia require reflexión.
Velaquí a razón última desta iniciativa.
Con estas premisas, o comité científico do Seminario elaborou o programa
e elixiu os relatores, e procurou que existise un adecuado balance entre os aspectos
teóricos e prácticos, entre as cuestións relacionadas coa Administración
electrónica e as políticas de dixitalización do patrimonio documental.
Introdución
17