Actas do Seminario Internacional O futuro da memoria - Arquivos de ...

2. Promóvese a difusión a través das tecnoloxías da información e das comunicacións,
facilitando o acceso a investigadores e cidadáns, ou, dito
doutro modo, multiplícase excesivamente a accesibilidade, xa que os documentos
se poden consultar a distancia e ao mesmo tempo por diversos
interesados e en diferentes localizacións.
3. Posibilítase o uso didáctico por parte da comunidade educativa e científica,
poñendo a disposición do profesorado as fontes primixenias de investigación
histórica. Para que a divulgación sexa máis eficiente e coa finalidade
de estimular a curiosidade do alumnado se engaden textos explicativos
acerca dalgúns documentos históricos reproducidos: unhas sinxelas
nocións sobre as diversas tipoloxías documentais que se poden atopar
nos arquivos3 .
4. Impúlsase a descrición arquivística mediante o inventario e catalogación
das series e pezas documentais de maior interese conservadas en arquivos
públicos e privados, porque a dixitalización esixe normalizar previamente
o que está desorganizado ou falto de descrición, para que a posterior
recuperación da información se realice con axilidade e sen menoscabo
algún.
5. Prodúcese un importante aforro dos onerosos custos que conlevan os
desprazamentos ate o lugar no que se atopan os documentos orixinais,
custodiados en arquivos que, ás veces, se achan moi afastados dos seus
potenciais usuarios, obrigándolles durante un tempo a executar importantes
gastos económicos en viaxes e estancias na localidade onde se sitúa
o arquivo de referencia.
6. Amplíanse considerablemente os limitados horarios de atención ao público
dos centros arquivísticos e, por conseguinte, os tempos de traballo
de investigadores, usuarios e interesados, que poden efectuar as súas
consultas as 24 horas do día durante os 365 días do ano.
7. En definitiva, supón un avance máis no proceso de democratización da
cultura, xa que os beneficios do documento dixital colgado na Internet
transcenden ao restrinxido número de cidadáns dunha circunscrición inmediata,
porque se dirixen e se ofrecen urbi et orbi, para a propia localidade
titular dos fondos e tamén para o resto dos interesados, onde queira
que se atopen.
373