Actas do Seminario Internacional O futuro da memoria - Arquivos de ...

362
Arquivo, Rede, Organización. O Centro quere ser un centro avanzado e organizado
de coñecemento e investigación para a difusión da riqueza documental
depositada no Arquivo Histórico Eclesiástico de Bizkaia que ademais actúa
como peza fundamental do sistema arquivístico diocesano. É dicir, non só se
ocupa da documentación xa depositada e de valor histórico, senón que recolle
e dá as normativas para a creación, xestión e conservación da documentación
actualmente xerada nos organismos diocesanos. O seu labor no só consiste
en custodiar a memoria documental e audiovisual, senón tamén pretende
xerala e crear a concienciación para que a documentación actual sexa a
memoria do futuro. O obxectivo fundamental do Centro Icaro é renovar as tarefas
e funcións do Arquivo, potenciando o seu labor de difusión mediante a
creación dunha ree avanzada de coñecemento, no que intentará integrar a
outras entidades (Universidades, arquivos, centros de documentación, etc.).
O Centro Icaro ten por obxecto principal aumentar a accesibilidade aos
fondos de arquivo depositado en AHEB-BEH como custodio do patrimonio
documental pertencente á diocese de Bilbao. Este patrimonio xerado e conservado
en todo tipo de soporte abarca un arco cronolóxico que vai dende o
século XII á actualidade. Pretendemos xerar, mediante a creación dun centro
de excelencia, un entorno adecuado que facilite a comprensión da función
que os arquivo en xeral e o noso en particular teñen para a sociedade e a cidadanía,
como fonte primaria de coñecemento do legado histórico e proba
de feitos e actuacións, ademais de servir como instrumento para coñecer a
importancia da escritura —nas súas diferentes versións ate a actualidade en
soporte electrónico— como principal medio de transmisión do saber e dos
actos ao longo da historia.
Neste Centro preténdese facer evidente de que maneira as principais funcións
dos arquivos, isto é, recoller, preservar e difundir, son esenciais para
construír a actual sociedade do coñecemento, adaptándose ás necesidades
consultivas da cidadanía, servindo como testemuños do paso da historia e
dos seus avatares, e facilitando tarefas administrativas fundamentais para
probar actos e asegurar liberdades e dereitos ás persoas. Tratamos de converter
en información útil e, sobre todo, accesible física ou virtualmente, e a
todo tipo de usuario, o coñecemento acumulado durante séculos nos documentos
que se conservan no Arquivo e sensibilizar sobre a importancia dos
documentos actuais para preservar a memoria actual para o futuro. Ademais,
co programa educativo, que foi presentado o pasado mes de maio e
que se porá en marcha durante o curso 2010-2011, queremos dar coñecer
a estudantes de todos os niveis educativos a importancia da memoria individual
e colectiva para valorar o pasado, incidir no presente e asegurar o futuro
da sociedade.