Actas do Seminario Internacional O futuro da memoria - Arquivos de ...

202
Os fins da conservación dixital
A conservación dixital trata de producir e xestionar datos de maneira que
asegure que reteñen tres características: lonxevidade, integridade e accesibilidade.
(Un comentario acerca do termo datos: este ensaio utiliza as definicións
que se atopan no Modelo do Ciclo de Vida da Conservación Dixital do
Digital Curation Centre. Datos son: «calquera información en forma dixital
binaria» e «inclúen obxectos dixitais e bases de datos». Os obxectos dixitais
poden ser:
simples... (ítems dixitais separados como ficheiros de texto, ficheiros de imaxe
ou ficheiros de son, xunto cos seus identificadores e metadatos relacionados)
ou complexos... (obxectos dixitais separados realizados mediante a combinación
dun certo número doutros obxectos dixitais, como os sitios web).
As bases de datos son coleccións estruturadas de rexistros ou datos almacenados
nun sistema informático («Modelo do Ciclo de Vida da Conservación
do DCC»).
A lonxevidade refírese á dispoñibilidade dos datos durante tanto tempo
coma os seus usuarios actuais e futuros (a Comunidade Designada do Modelo
de Referencia OAIS) o requiran. (A Comunidade Designada é definida
no Modelo de Referencia OAIS (ISO, 2003) como Un grupo identificado de
consumidores potenciais que deberían ser capaces de comprender un conxunto
particular de información).
Estamos a tratar de asegurar que os usuarios actuais e futuros sexan capaces
de localizar os datos, recuperalos dende onde estean localizados, representalos
(convertelos a unha forma na que poidan ser comprendidos),
manipulalos e utilizalos; todo iso sobre a base dunha tecnoloxía que cambia
co que parece ser unha rapidez e aumento. A causa desta tecnoloxía rapidamente
cambiante o ciclo de vida dos datos é curto, a non ser que se emprendan
accións. O período de tempo durante o que teñen que se manter os datos
varía, pero o período mínimo de tempo usualmente é superior ás expectativas
de vida de acceso (o hardware e o software deseñados para ver e/ou
utilizar os datos).
A integridade refírese á autenticidade dos datos ao feito de que non fosen
manipulados, falsificados nin substituídos. Posto que case todas as técnicas de
conservación dixital alteran de maneira inevitable os datos (un punto que se
explora con detalle máis adiante) a autenticidade ten que amosarse prestando
atención a características tales como a procedencia (de onde viñan os datos)
e o contexto (as circunstancias que circundan a creación, a recepción, o
almacenamento ou o uso dos datos e as súas relacións con outros datos).