Actas do Seminario Internacional O futuro da memoria - Arquivos de ...

Os días 18 e 19 de novembro de 2010 celebrouse en Santiago de Compostela,
baixo o patrocinio da Fundación Cidade da Cultura de Galicia, o seminario
internacional O futuro da memoria: o patrimonio arquivístico dixital.
Esta reunión constituíu unha das primeiras actividades públicas do Arquivo
de Galicia, creado de forma oficial arredor desas datas. Un proxecto que
se enmarca no contexto da posta en funcionamento da Cidade da Cultura
de Galicia, onde se acha a sede deste centro.
O obxectivo do Seminario era crear un espazo de diálogo entre especialistas
de alto nivel mundial, e destes con outros prestixiosos profesionais de
Galicia e do resto de España, arredor dos diversos aspectos presentes no tema
do seminario: a conservación da memoria arquivística dixital. Ao tempo,
pretendiamos que o propio Arquivo, como toda a Cidade da Cultura, comezase
a ser considerado polos profesionais galegos como un lugar de encontro
e de reflexión permanentes sobre os problemas máis actuais do desenvolvemento
das políticas arquivísticas e, en xeral, da xestión do patrimonio
documental.
Este volume recolle as actas dos traballos que alí se presentaron. Sen dúbida,
cada un deles constitúe unha achega imprescindible ao estado da cuestión
no mundo e no noso país. Unha realidade intanxible, enormemente
complexa e cambiante, conformadora dun novo paradigma na conservación
da memoria humana.
Fronte a esa nova realidade, xa non é posible a inacción. Os profesionais
e os poderes públicos debemos actuar de forma deliberada e constante con
accións concretas enmarcadas en políticas e plans deseñados para o efecto.
Por iso, un centro nacido, como nace o Arquivo de Galicia, neste momento
de cambio, non podía deixar de lado esta cuestión. Por iso, debe contribuír
con iniciativas como esta a garantir no presente un futuro para a memoria
dixital.
Roberto Varela Fariña
Conselleiro de Cultura e Turismo