Actas do Seminario Internacional O futuro da memoria - Arquivos de ...

356
houbo un intenso labor de definición dos criterios de indexación dos rexistros
sacramentais, recollidos de forma exhaustiva nos manuais elaborados a
tal efecto polo equipo técnico que coordinou os labores de indexación dun
amplo equipo de profesionais que, con distintas vinculacións e dedicacións,
desenvolveu este arduo e pola súa vez enriquecedor traballo3 .
O feito de ter que aplicar as novas tecnoloxías para a difusión e consulta
dos rexistros sacramentais proporcionou, como sinalamos, un alto valor engadido
e interese público a esta documentación. Por outra parte, a necesidade
de colocar na web un elevado volume de datos (uns cinco millóns de
rexistros previstos inicialmente), provocou unha reformulación do desenvolvemento
informático do Arquivo. Se nunha primeira etapa de informatización
plasmaramos os conceptos básicos de xestión arquivística, nesta segunda
tivemos que asegurar a descrición e normalización xunto coa difusión dos
instrumentos de descrición e consulta na Internet así como a xestión de
usuarios e expedientes de solicitudes on line (Castillo; Barroso, 2006, 87-90).
Para integrar todo isto, pasamos do sistema de xestión anterior (Sistema
AdHoc tamén elaborado no propio arquivo en FileMaker) a un sistema inet,
que denominamos SIGA-AKIS (Sistema Inet de Xestión de Arquivos-Agiritegien
Kudeaketarako Inet Sistema). Funciona totalmente cunha interfaz de
usuario web e está desenvolvido con software libre, GNU/Linux, e PostgreSQL,
o que posibilita un alto rendemento na xestión dos grandes volumes
de información e unha optimización na xestión interrelacionada de datos.
Foi elaborado a partir das directrices e requirimentos prefixados polo
persoal técnico do AHEB-BEHA e polo equipo técnico de Novas Tecnoloxías
do Bispado de Bilbao e Suspergintza Elkartea, actualmente St3Elkartea, o
que supón, ademais, un bo exemplo de colaboración interdisciplinar entre
profesionais da arquivística e da informática.
Arquivo on line: apertura sen límites de tempo nin espazo
Dende maio de 2004, a páxina web do arquivo, www.aheb-beha.org, permite,
como xa sinalamos, a consulta en liña do catálogo xeral do arquivo e
de máis de dous millóns de rexistros sacramentais anteriores a 1900 inclusive,
que estaban a ser actualizados case diariamente durante o proceso de extracción,
coa correspondente referencia en Badator4 . Ofrecemos, tamén, a
posibilidade de solicitar servizos de reprografía (fotocopias de microfilme,
certificados, transcricións literais, etc.) e só neste caso deberá darse de alta
como usuario, coa única condición, se se realiza a alta a través da Internet,
de dispoñer de correo electrónico para realizar por este medio todas as comunicacións
dunha forma case automática.