Actas do Seminario Internacional O futuro da memoria - Arquivos de ...

376
Á Fundación Séneca interésalle o proxecto CARMESÍ polos programas que
desenvolve sobre formación para a ciencia e a tecnoloxía e sobre xeración e
intercambio do coñecemento científico. É de resaltar aquí o pragmatismo
que ten o CARMESÍ pola súa alta posibilidade de aplicación no ensino, tanto
de grao medio como superior, e o uso didáctico que se pode facer del. Esta
Fundación coopera coa achega de persoal técnico, xeralmente seleccionado
mediante a convocatoria de bolsas para a realización de inventarios e catálogos
dos documentos dixitalizados.
As corporacións locais e outras organizacións, pública e privadas, propietarias
de fondos de interese común representan a parte máis imprescindible
do proxecto, porque facilitan os documentos obxecto de reprodución, sen os
cales o CARMESÍ se extinguiría. Sen custo algún para elas, só debe autorizar
a dixitalización e a difusión das imaxes no portal. O seu número acada hoxe
23 institucións5 , e nos próximos anos a cifra incrementarase coa participación
de novos concellos e entidades do ámbito da ciencia e a cultura, así como
de coleccionistas particulares de prensa local.
Por outra parte, CARMESÍ non é un produto erudito destinado exclusivamente
a consumados historiadores e a outros especialistas do ramo. A este
colectivo bástalle con dispoñer das imaxes dos documentos e unha breve
descrición dos mesmos para saciar a súa necesidade de investigación ou esporádica
consulta. O CARMESÍ ten un deseño eminentemente divulgativo, e
o noso empeño é chegar ao maior número de cidadáns posible e cunha preparación
heteroxénea. Esta idea expúxose á Real Academia Alfonso X o Sabio,
institución murciana da área da investigación en humanidades e ciencias
sociais, que a acolleu con interese, advertiu o seu proveito e utilidade, e dende
2007 se incorporou ao proxecto coas transcricións de documentos históricos
publicadas nos numerosos volumes editados da súa Colección de Documentos
para la Historia del Reino de Murcia. Así, a transcrición asociada
ao documento orixinal facilita a súa consulta e lectura por parte dos non iniciados
no coñecemento da paleografía. No momento de escribir estas liñas
logrouse xa instalar na web a totalidade das transcricións dispoñibles nos libros
antes citados, que acadan o número de 2.694.
É importante sinalar tamén que o CARMESÍ non conta con persoal propio
que o atenda en exclusiva. Por iso, é de xustiza recoñecer a implicación directa
e persoal do reducidísimo equipo humán que intervén cada ano en dotar
de contido cada nova fase do proxecto. Este equipo áchase conformado
por arquiveiros (do Arquivo Xeral e Municipais) e enxeñeiros (da Fundación
Integra) que realizan no seu quefacer cotián funcións distintas nos seus centros
de traballo, e aos que cada ano se lles pide un esforzo complementario
para sacar adiante unha nova fase do proxecto.