Actas do Seminario Internacional O futuro da memoria - Arquivos de ...

teria de preservación, xunto a políticas de migración e cambio de soporte.
A sinatura de arquivo ou sinatura lonxeva aplicaríase non xa aos documentos
senón aos obxectos resultantes dun proceso de empaquetamento ou encapsulado
de documentos electrónicos. Son eses obxectos ou paquetes —e
os seus metadatos asociados— os que se transfiren a un repositorio centralizado
onde se custodian xunto a documentación de diversidade de organismos
e, incluso, de administracións públicas diferentes. Isto é xa unha realidade
que foi xurdindo paulatinamente, polo menos no plano normativo, incluso
antes da LAE, e que con esta acada un impulso definitivo70 .
Con todo, non semella atrevido concluír que a Administración electrónica
implica cambios profundos nos principios e quefaceres arquivísticos (e,
consecuentemente, no perfil dos profesionais71 ) e na materia de infraestruturas,
competencias e responsabilidades.
Un dos máis notables verase respecto das infraestruturas arquivísticas.
O arquivo como concepto físico desaparece a favor de repositorios electrónicos
residentes en servidores interconectados a través de redes como SARA
ou, incluso, a nivel europeo, sTESTA. Tales repositorios considéranse complementarios
e equivalentes en canto á súa función aos arquivos convencionais
(art. 21.2. RDENI) que, todo parece indicar, están abocados a se converter,
en tanto custodien fondos tamén convencionais, en arquivos pechados, a
salvo do que poida implicar a transferencia aos mesmos de copias dos documentos
electrónicos e, por descontado, de que se lles adxudique a función
de custodia lonxeva dos mesmos72 .
E isto é só o principio. Cada día adquire maior importancia «a nube», isto
é, o cloud computing, circunstancia á que o sector público tampouco non
é alleo e que implicará que nin sequera poderemos falar dos repositorios como
sistemas de almacenamento de datos fisicamente situados nas administracións
titulares senón en centros de datos ou data houses —públicos ou
privados— que poden atoparse en Madrid, en Oslo ou en Wisconsin73 .
A transferencia entre fases ou tipos de arquivo74 verase substituída pola intervención,
en distintos momentos, de diferentes actores responsables da
cumprimentación —ou da determinación previa— de valores en distintos tipos
de metadatos, tendo lugar na última fase do seu ciclo de vida.
Á espera das normas técnicas que desenvolvan os esquemas de interoperabilidade
e de seguridade constatouse que, en xeral, existe unha sensación
de indefinición arredor do arquivo electrónico, propiciado en parte por unha
falla de criterios a seguir para a conservación dos contidos, que información
é obrigatorio conservar, a definición de responsabilidades sobre a preservación
da información electrónica e de mecanismos para a interoperabilidade
con outros sistemas75 .
115