Actas do Seminario Internacional O futuro da memoria - Arquivos de ...

A modo de inciso, dende ámbitos impulsores da Administración electrónica
e, significativamente, empresariais —tamén políticos— argumentouse
en ocasións que as ditas normas, aínda que «ben intencionadas, inhiben a
innovación». Sen querer caer no sempiterno complexo de vítimas da profesión,
dado que a cuestión do arquivo electrónico, dende a perspectiva normativa,
apenas foi abordada ate agora, quizá non estea de máis lembrar que
as administracións pública réxense polo Dereito administrativo, aínda que a
fuxida do mesmo, en acepción moi estendida entre a doutrina, sexa algo frecuente.
O equilibrio entre modernización e regulamento do funcionamento
das administracións públicas é delicado pero imprescindible. Aínda que deba
considerarse a aplicación de determinados criterios propios do sector privado
para levar a cabo a súa función máis eficientemente, o dito funcionamento
nunca poderá ser equiparable sen máis ao das empresas privadas e se
realizará sempre con pleno sometemento ao Dereito. Porque é evidente que
o principio constitucional de eficacia non pode entenderse de igual forma
nas administracións públicas que no ámbito privado, da mesma maneira os
fins non son os mesmos.
Isto ven a conto porque existe toda unha serie de obrigas normativas arredor
dos documentos públicos, da súa autenticidade, da súa conservación, xa
como constancia de dereitos e de deberes, xa como bens do patrimonio documental,
pese a que, na voráxine da Administración electrónica, a súa xestión
—en definitiva, a do arquivo electrónico— parecía haberse deixado nun
certo segundo plano (Software, 2009)…
Por outra parte, non son iguais os riscos que presentan as TIC en comparación
cos medios tradicionais en canto á preservación de dereitos relacionados
coa información. As aplicacións de Administración electrónica debe protexer
os dereitos dos cidadáns relativos á protección dos seus datos persoais
e da súa intimidade nun entorno aberto (Internet) e non de todo seguro; ou
respecto ás consecuencias que para as garantías do cidadán na súa relación
coas administracións públicas poidan derivarse da implantación da Administración
electrónica e que nos sitúan, entre outras cuestións, ante a denominada
fenda dixital.
Como se concilie todo isto con políticas de transparencia e, en concreto,
co exercicio activo do dereito constitucional ao acceso a arquivos e rexistros
públicos (art. 105.b da Constitución española) é algo que está plenamente
por definir.
95