Actas do Seminario Internacional O futuro da memoria - Arquivos de ...

O que define a transparencia no ámbito administrativo non é senón o acceso
á información en poder das administracións públicas, isto é, dereito de
acceso puro e simple, consagrado no art. 105.b da Constitución e desenvolvido
—de modo case unanimemente criticado— 76 no art. 37 LRXPAC. Unha
norma que, coa chegada da Administración electrónica e a consagración do
dereito de acceso electrónico aos servizos públicos, queda aínda máis en evidencia,
pois a tecnificación dos procedementos, se non media o dito cambio,
só se diferenza no contexto da AE na inmediatez, na non necesidade de
desprazamento físico (o que, certamente, non é pouco), pero non pode venderse
como maior transparencia salvo que degrademos un tanto o verdadeiro
significado do termo no contexto da información administrativa. O mesmo
sucedería co termo «democracia»: un maior, máis preciso e rápido coñecemento
dos intereses ou opinións dos cidadáns pode ser beneficioso para a
democracia se se articulan os mecanismos para a tradución efectiva dos mesmos.
O contrario, no entanto, sería tan só unha enquisa tecnoloxicamente
máis elaborada onde o medio confúndese co fin.
Polo demais, a LAE, no seu art. 6.1, limítase a un reenvío en bloque ao
art. 35 LRXPAC (e, por ende, ao 37, regulador do dereito de acceso aos rexistros
e arquivos das Administracións públicas) e ademais recoñece, en materia
de transparencia, os dereitos seguintes:
❚ 6.2.d) A coñecer por medios electrónicos o estado de tramitación dos
procedementos nos que sexan interesados, salvo nos supostos en que a
normativa de aplicación estableza restricións ao acceso á información sobre
aqueles. Este dereito predícase tanto de procedementos electrónicos
como non electrónicos ex art. 37 LAE e non supón ningunha novidade lexislativa,
salvo pola referencia aos medios electrónicos. Que, por certo, de
acordo co enunciado do artigo, non permite saber se se refire a procedementos
rematados ou non. Se inclúe tamén a estes últimos, é evidente a
incidencia da normativa reguladora do dereito de acceso xeral. Xurde inmediatamente
outra cuestión que, segundo o visto, queda pendente: o
acceso directo non xa á relación de trámites ou á información sobre o estado
en que se atope un procedemento, senón o acceso directo, vía electrónica,
aos documentos. Como se verificará na Administración electrónica
a modalidade de acceso contemplada no art. 37.7 LRXPAC, consistente
en eximir ao investigador da regra xeral de individualizar previamente
os documentos aos que se desexa acceder, evitando así a intermediación
da Administración para localizalos e poñelos á súa disposición77 ?
❚ 6.2.e): A obter copias electrónicas dos documentos electrónicos que formen
parte de procedementos nos que teñan a condición de interesado.
117