Actas do Seminario Internacional O futuro da memoria - Arquivos de ...

354
de dixitalización das series sacramentais dos fondos parroquiais2 . Superados
a euforia e o desconcerto iniciais, pronto puidemos comprobar que non se
trataba dun mero cambio de soporte, senón que traía canda si un cambio
cualitativo de gran importancia. En primeiro lugar, sen dúbida, o máis necesario
era modificar o plan de actuación para o quinquenio 2000-2005, porque
había que integrar o citado proxecto de dixitalización. Agora ben, dende
o principio o concibimos como creación do servizo dixital do arquivo. Non
está de máis lembrar de novo o obvio, a dixitalización trae canda si, ademais
da reprodución noutros soportes, unha redefinición de todos os servizos e
políticas do arquivo, afectando notablemente á súa política de difusión e
dando un alto valor engadido á documentación custodiada.
Así á hora de definir o proxecto, os seus obxectivos e a súa metodoloxía,
tiñamos en perspectiva a creación dun servizo de información e difusión
interactiva, non só un mero cambio de soporte ou copia de seguridade (xa
tiñamos o 90%) dos fondos microfilmados). O obxectivo principal era facilitar
ao máximo a consulta dos rexistros sacramentais que, como amosaban as
estatísticas dende 1976, xeraban máis do 85% dos pedidos en sala e case o
100% das peticións externas por correo ordinario, teléfono ou, dende 1998,
por correo electrónico. Incluso deseñamos o iter de traballo en función das
estatística de consultas que tiñamos dende 1976, dando prioridade ás parroquias
máis consultadas. Optamos pola dixitalización da colección de pergamiños
—porque non estaban microfilmados— e das series sacramentais das
190 parroquias con documentación anterior a 1900 depositada no AHEB-
BEHA. Apostamos pola reprodución dixital como medio para unha mellor difusión
dos fondos, porque as pantallas de ordenador —máis baratas que os
lectores de microfilme— permiten imaxes de maior calidade ou incluso a restauración
dixital e, ademais, para asegurar a rápida localización e identificación
dos rexistros sacramentais, todo o proceso vai acompañado dunha exportación
de datos.
Esta documentación parroquial, sen esquecérmonos da súa función primaria
de rexistro da administración de sacramentos e reflexo da vida dunha
comunidade cristiá ao longo dos séculos, posúe unhas características que facilitan
a priori a dixitalización e indexación, pola súa aparente uniformidade.
Aínda que con diferenzas de forma, esta documentación contén unha información
específica e orixinal, representativa de toda a poboación (os rexistros
sacramentais á sazón actúan como rexistro civil ate fins do século XIX). A súa
facilidade de uso e relativa sinxeleza na lectura e acceso (sobre todo a partir
do século XVIII), fan que poida ser utilizada por un amplo abano de usuarios
e non estea dirixida a un público elitista ou minoritario. Por outra parte as series
sacramentais dos fondos parroquiais eran e seguen a ser con moito as