Revista Haemus nr. 30-32 - Libraria pentru toti

GEORGE ISTRATE
Njeriu i ndërprerë
(Poemë dramatike)
460
Motto:
Trup që falë fjalëve rron ti
varre janë librat e mi
bardhë ngritur mbi ledh me dhé
janë i vogëlthi im mauzolé.
(g.i.,4 prill.2003)
ZOTI: … jam pafundi i panisur...
I PALINDURI: Po ti ku je, mëmë e askujt? Dora ime e vogël nuk të cek, si
zambaku kënetën. Eja, nëm ushqim, që të jem, të bredh në tingull, nëm
veshë të të dëgjoj se si më lind nëpër trandjen e dhembjes. Mos ki droje nga
unë ngaqë të ngjaj. Një gozhdë ngul në qiell kryqin tim të pandodhur dhe të
lagur prore në lëngun embrional të shkëputjes. Nëm himne ta dëgjoj edhe
unë tingullin e jetës dhe eja brenda meje, në shpellën e prehërit tënd të
shumëlavduar.
ATI: E kam mbuluar llampën me mushkëritë e mia të shpërthyera. Zoti ishte
shëndoshë e mirë. E dërgoi kumtin, të cilin e zmadhova nën një lupë-femër.
I PALINDURI: Jam ende rënkim, jam ende bërthamë, jam ende natë
sferike…
NËNA: Pata nisur të të mbaroj dhe pikërisht po t'i sajoja qepallat, sepse aty,
tek unë, kish mbetur ende pak dritë.
I PALINDURI: Më pjerrnin disa zogj të çuditshëm prej avulli të imët dhe
rrëshqita në ujin e amëshuar...
NËNA: E plagosur është dita nga jashtë – nga brenda është e bardhë si
qumështi im…
ATI: I fajshëm është çasti – rrudha e kohës e keqe! E kam djegur urën mes
fjalëve, i kam lëpirë thembrat e shqyera udhëve dhe jam kthyer në frerin tim
të ndryshkur, duke e zvarritur mishin nëpër kalbësitë e jetës.
NËNA: Syri m'u valua duke këqyrur nër ovula. Ti ku je dhe ku pluskon, bir i
shqetësuar? Kam rroba të vogla të të vesh, por nuk i kam eshtrat e tua, as
supet e tu. Kam qumësht që e derdh nëpër monopatet e botës. Ti ke qiellin
tënd të rrumbull mbi të cilin as ëngjëjt nuk guxojnë të flatrojnë.
ZOTI: Jam Pika E Vetme në Pafundësi. Rënkimi im është tërmet. Ndjej frikë
nga vetvetja; përmes pasqyrash shihen copëzat e ish-kohës. Para se të jem, nuk
kam qënë asnjëherë. Jam mik me përjetësinë. Mosqënia juaj njerëzore më
përket, ajo rindez krejt terrin. Oh, sa e dhimbshme qënka të mos kesh hije…
I PALINDURI: Ç'natë e gjatë m'i mbulon tëmthat? Rëndshëm punoj në