kulturgileak gizarte mugimenduetan - Euskara

garatuz. Gure harremanezko interpretazioan, aldiz, intelektual
kontzeptuaren esanahi aniztasuna ez da teorikoki konpondu beharreko
arazoa. Aniztasunaren fenomenoa behin eta berriro berresten bada,
gertakari horren arrazoia azaldu behar da. Ildo horretatik, harremanezko
ikuspegiak bidea ematen digu pentsatzeko kontzeptuak itsatsita dauzkan
adiera desberdinak —batzuk hegemonikoak, beste batzuk
bazterrekoagoak— kulturgileen artean definizio zilegi bat ezartzeko dagoen
lehia biziaren emaitzak direla. Horrela, interpretatu gura den errealitatearen
atal bilakatu da definizioa bera. Hartara, definizioaren auziari irtenbide
teorikoa eman nahi izango bagenio, ahaztu egingo genuke kulturaren
esparruan, gizartean bezala eta gizarteko beste esparruetan bezala,
harreman gatazkatsuak daudela. Ahaztu egingo genuke, halaber, definizio
nagusiaren ezarrerarekin definizioaren inguruko eztabaidan parte hartzeko
eskubidea daukatenen kopurua mugatu nahi izaten dela, besteak beste,
definizio alternatiboak defendatzen dituztenen legitimitatea.
Erlaziozko ikuspegia abiaburu hartzean eta kulturgilea gizartean
kokatzean zalantzatan jartzen da, bestalde, hain ohikoa den intelektual
askoren handiustezko (auto)pertzepzioa. Kokapen sozial horrek agerian
jartzen du zenbateraino dauden baldintzaturik gure pentsamendu kategoriak
—baita kulturgileenak ere—, eta zenbateraino kutsaturik munduari buruz
mintzatzen eta pentsatzen uzten diguten gaitasunak. Debrayk egoki
erakusten duen legez, intelektualek aparteko zailtasuna daukate beraien
hautaketa eta zentsura mekanismoak, beraien promozioak eta esklusioak,
ikusgai bihurtzeko. Horrenbestez, intelektualek isiltzen dutenari buruzko
galderak egiteko premia azpimarratzen du autore frantziarrak (Debray,
1979: 27-28).
97