kulturgileak gizarte mugimenduetan - Euskara

direnik. Mugimendu bat era askotako erakundez osaturik egon daiteke.
Bestalde, mugimendu bakoitzak instituzionalizazio maila jakin bat
erdiesten du bere ibilbidearen faseetan.
Osterantzean ere, esparru kognitibo modura hartuta, gizarte
mugimenduetan dauden adituen tradizioak eta tradizio akademikoak
bereizita agertzen dira. Behin baino gehiagotan, aurrez aurre kokatuta
daude jarduera intelektualari dagokionez. Izan ere, tradizio akademikotik
datozen kulturgileek autonomia handiagoa daukate mugimenduei buruz.
Aldiz, adituak, mugimendu aktibistak izan ohi dira zentzu hertsiagoan.
Akademikoen lan intelektualean, gizartean nagusi den kultura legitimitatea
gailentzen da beste interes batzuen gainetik. Adituen ezagutza interesak,
ordea, mugimenduen interes estrategikoei loturik daude modu estuan.
Halatan, “mugimendu intelektualak” deitu ditugun horiek —
kulturgile gisa gizarte mugimenduen barnean sortu diren kultura
eragileak— gehienetan aditu gisa jarduten dute mugimenduaren
erakundeetan, haren ildo estrategikoak lantzen eta betearazten.
Horretarako, maiz, intelektual akademikoengandik jasotako oinarri
teorikoak itzuli eta moldatzen dituzte, eta mugimenduaren premia eta
aukera politikoetara egokitzen dituzte. Beste era batera adierazita, adituen
lanari esker —haiek egindako itzulpen prozesuak direla medio— zientzia
kultura bilakatzen da mugimenduaren barruan. Horrela, kulturgile batzuek
sortutako teoria praktikan hezurmamituta aurkitzen dugu mugimendu
jardueran. Ildo horretan, adituak kultura dibulgatzaile garrantzitsuak dira
gizarte mugimenduen testuinguruan, ez soilik maila teorikoan, baita
praktika sozialen arloan ere.
420