kulturgileak gizarte mugimenduetan - Euskara

zientifikodun zein zientifikorik gabeko sinesteetan funtsatutakoa. Ekoizpen
sistema desberdinen emaitzak dira bi ereduak, baina badaude bien arteko
loturak ere. Izan ere, Beranduko Modernitatean lehenengo ezagutza motak
gero eta gehiago elikatzen du gizakien sen oneko ezagutza edo ezagutza
arrunta deritzona.
Gizarte mugimenduek, hain zuzen ere, bi mota horietako ezagutza
sortzen eta baliatzen dute. Lehenik sen oneko ezagutza erabiltzen dute,
ezinbestean erabili ere, gizartean une historiko jakin batean nagusi den
ezagutza baita. Baina, horrekin batera, jakintza berezituak eta landuak ere
baliatzen dituzte, kulturgileek, zientzialariek eta adituek mugimenduaren
esparruan sortutakoak edo landutakoak. Izan ere, mugimenduen barnean
ezagutza berezituak bultzatzen dituzten interes sozial indartsuak agertzen
dira maiz, arestian azaldu den moduan, kultura kapital handia metatzen
duten testuinguru sozial trinkoak eratzen baitira mugimenduen esparruan.
Interpretazio marko berriak aldarrikatzen dituztenean, mugimenduak
ahalegintzen dira kulturgileek landutako jakintza berezitu horiek gizarteak
onartutako sen oneko ezagutza bihur daitezen. Azken batean, ezagutza
arrunta eztabaidan jartzen ez den ezagutza da. Bestela adierazita, garai
historiko batean eta indarrean dagoen kultura batean mundu guztiak
jakintzat ematen duena jasotzen du. Transfigurazio hori egiteko asmoz,
gure gizarteetako ideien merkatu lehiakorretan baliabide zientifikoak eta
berezituak erabiltzen dira; kulturgileek, zientzialariek eta adituek gune
horietan dihardute ezinbestean. Bada, sen oneko ezagutzaren —hau da,
ebidentziaren— estatusa lortzeko lehian dauden definizio sozialak asko
dira eta legitimitatea erdiesteko lehia sinbolikoak korapilo handiak dauzka
gizarte konplexu batean. Hori dela eta, gizarte eragile guztiek —gizarte
mugimenduek barne— baliatzen dituzte ahalik eta lanabes sinboliko
eraginkorrenak.
395