kulturgileak gizarte mugimenduetan - Euskara

Gizartearen irudikapenen eraikuntzan kazetariek eta profesional
mediatikoek daukaten gizarte eragina handia izanik, ez da txikiagoa euren
nagusigo estrategikoaren ondorioz kulturgintzaren esparruan sorrarazi
duten berregituraketa. Dudarik gabe, gizartearen esparru publikoa
menderatu ez eze eremu akademiko-intelektualaren funtzionamendua ere
baldintzatu dute intelektual mediatikoek eta etengabeko astinaldiak eragin
dituzte haren barne egituran. Hainbestekoa izan da baldintzapena non,
hedabideei eta kultura industriei uztarturiko tradizio intelektualaren
garapenak irauli egin dituen intelektualaren definizio klasikoek behinola
ezarritako mailaketa hierarkikoak. Hala, kulturaren munduan orain urte
batzuk nagusi ziren definiziook bazterreko kokapena esleitzen zioten
kazetariari esparru intelektualaren barnean. 107 Gaur egun, aldiz, esparru
intelektualeko zenbait eremutan haien aurkako erresistentzia handiak
agertzen diren arren, intelektual mediatikoek eta kazetariek onespen handia
erdietsi dute gizarte esparruan. 108 Baina, haratago joan da mundu
mediatikoaren oldarra. Izan ere, baliabide mediatikoak gero eta gehiago
nahasi dira beste kultura esparruetako harremanetan eta kontsakrazio
prozesuetan. Hartara, zabalkuntza mediatikoan erabat edo aldi batez sartzen
diren akademikoek edo zientzialariek ere gaur egun ongi erabili ditzakete
gizarte aintzatespenaren baliabide sinbolikoak euren jatorrizko
azpiesparruko sustapena bultzatzeko.
107 Kategoria intelektual nagusi eta periferikoen arteko bereizketa, intelektualei buruzko
definizio klasiko askotan aurkitu ahal dugu. Ikusmolde horietan kazetaria edo
hedabideetako kulturgilea esparruaren bazterretan kokatuta egon ohi da (Lipset, 1987:
272; Shils, 1977: 145-146; Aron, 1979: 204). Planteamendu horien berrikusketa
egiteko, ikus Larrinaga, 2001.
108 Brockmanen ustetan, intelektual zientzialariak ere gero eta txertatuago egongo
lirateke egungo masa kulturan, zientziaren hedapen mediatikoa baita izatez sortzen ari
den “hirugarren kulturaren” oinarria. Hirugarren kultura, alegia, zientziaren eta masa
kulturaren bategitearen emaitza, hartzen du autoreak etorkizuneko kultura biltzailetzat.
Ikus Brockman, 1996.
275