kulturgileak gizarte mugimenduetan - Euskara

5. Engaiamenduaren bide berriak. Gizarte
mugimenduko tradizio intelektualaren egokitzapena
Modernitatearen krisiaren testuinguruan
Orain arte ikusi denaren arabera, hainbat dira kulturgintza esparruan
sortu eta garatu diren tradizioak. Alabaina, aipatu ditugun tradizio
intelektualak ezin dira ulertu elkar baztertzen duten eredu modura. Aitzitik,
kulturgile askok tradizio bat baino gehiagotan kokaturiko praktikak
burutzen dituzte —nahiz eta horiek ez daukaten garrantzi berbera esparru
intelektualean—. Behin baino gehiagotan rolak nahasi eta konbinatu egiten
dira. Eginkizun kulturalak ere modu askotan lotuta eta erlazionatuta
azaltzen zaizkigu. Izan ere, jarduera eremuen arteko mugarriak lauso ageri
dira eragile berberek era askotako praktikak burutzen dituztenean euren
jardunean. Beraz, denborazko ikuspegi sinkroniko batetik abiatuta, hainbat
finkatze mailatako tradizio intelektualak hartzen ditu barnean gaur egungo
esparru intelektualak. Alta, esan bezala, eredu guztiek ez dute ospe eta
botere maila bera erdiesten. Badaude gainbehera egoera pairatzen duten
tradizioak, hegemonia daukatenak eta, berrienak batik bat, praktika
legitimo gisa onartu ditzaten lehiatzen direnak.
Bai Modernitatearekin batera sortu ziren tradizioek (tradizio
akademiko-zientifikoek, estatu eta merkatu burokrazietako adituek,
erakunde politikoetako ideologoek) bai Beranduko Modernitatekoek
(hedabide eta masa kulturari atxikitako tradizioek, politikagintza molde
berrietan sortutakoek) eginkizun intelektualerako ereduak eskaintzen
dituzte esparru konplexu eta aldakorrean. Hain zuzen ere, bide berriak
urratzen ari diren ereduetan jarriko dugu arreta hemendik aurrera egingo
den azterketan. Halatan, aurreko tradizioen berrirakurketatik abiatuz,
278