kulturgileak gizarte mugimenduetan - Euskara

especializados, indicamos diferentes medios para llegar a esos fines. (Merton,
1987: 293).
Haatik, gizarte errealitatea ez dago, azterketa teorikoek sarritan
irudikatu duten erara, egintza esparru zurrunetan banatuta. Inon ez ditugu
aurkituko elkarren kutsadura eragozten duten konpartimendu hermetikoak.
Kulturgileen eta esparru politikoaren artean historikoki ezarri diren
harreman polemikoen adibide on bat, intelektualen azterketan arituriko bi
autorek eskaintzen digute: Bendak eta Chomskyk, hain zuzen ere. Garai
desberdinetan egindako lanetan ikusmolde zeharo kontrajarriak eskaini
dituzte beraiek. Aipatu diren intelektual ereduak, ideologoa eta aditua
hurrenez hurren, dauzkate aztergai Bendak eta Chomskyk. Zenbait
definizio normatibotatik abiatuz, errealitatean gertatzen diren
“desbideraketak” salatzen dituzte batak eta besteak, hots, intelektualek
behin eta berriz egindako “traizioak” Apaizen traizioa eta Mandarin
berriak izeneko liburuetan. Bendak aztergai dauzkan intelektual traidoreak
—bereziki Action Française taldea sortu zuten doktrinazale fanatikoak,
euren adimena aberria, nazioa, estatuaren boterea eta antzeko grinen mende
jarri zutenak— ideologoarekin identifikatu daitezke. Chomskyk gogoan
dituen intelektualak, aitzitik, adituak dirudite: estatuaren zerbitzuan
diharduten soziologoak eta zientzialariak dira, euren gaitasunekin gerraren
eta botere inperialisten interesen garapenean laguntzen dutenak. Bendak eta
Chomskyk batzuei eta besteei zuzentzen dizkieten salaketak ongi erakusten
dituzte kategoria normatiboen arteko aldeak eta euren eredu idealek logika
politikoarekin funtsean dauzkaten antzekotasunak. Apaizei (clerc
deritzetenei) apaizen egintza inspiratu behar duten printzipioei huts egitea
leporatzen die Bendak. Izan ere, haren argudioetan, justizia eta egiaren
printzipioak saldu dituzte aberria edo alderdiaren truke. Hartara, printzipio
faltsuen jarraitzaile bihurtzean, euren egitekoari traizio egin diote. Adituei,
58