kulturgileak gizarte mugimenduetan - Euskara

Politika ulertzeko eredu berria sortzearekin batera emantzipazio
eskubideen eskariaren garrantzia ez da derrigorrez gutxitu behar gaurko
politikagintzan. Izan ere, emantzipazio politika ez da desagertzen “bizitza
politika” programa politiko orokorretik gehiago eskatzen hasten denean,
bizitza politikari lotutako gai guztiek barne hartzen baitituzte emantzipazio
arazoak. Are gehiago, Beranduko Modernitatean, autogarapen
indibidualaren eta kolektiboaren baliabideen inguruan biltzen da klaseen
eta bestelako desberdintasunen banaketa. Hori dela eta, emantzipazioak,
bere adierarik erradikalenean, bizitza politikaren eraldaketa ere eskatzen
du. Ildo horretan, emantzipazioa ezin da gehiago ulertu desberdintasun
materialen gainditze huts modura; gabezia ekonomikoak eta politikoak ez
ezik menderatze kulturalaren kritika ere barnean hartu behar dute
emantzipazio eta autonomia egitasmoek. Horrexetan datza, hain zuzen ere,
politika berriaren ekarpenetako bat, gizarte gabeziaren dimentsio
kulturalaren azaleratzean.
5.2. Modernitatearen krisialdiaren eragina intelektualaren ohiko
estatutuan. Intelektualaren deuseztapena?
Aro Modernoan intelektual ilustratuak zeukan estatus tradizionala
zeharo ahuldu duten prozesuak aipatu ditugu orain arte. Alde batetik,
ezagutza legitimoaren sekularizazioa izan dugu hizpide. Ildo horretatik,
ezagutzaren sortzaile eta banatzaile izan da intelektuala; hain zuzen ere,
jarduera horretan oinarritu da kulturgile modernoaren agintearen iturrietako
bat. Beste aldetik, politikaren zatikapena eta —bereziki XX. mendearen
lehen bi herenetan— politikagintza modernoari zentzua eman zioten
emantzipazio proiektu handien gainbehera aztertu dugu. Jakina da
intelektual politiko ilustratua ere proiektu horiei lotuta egon dela zuzenean.
313