kulturgileak gizarte mugimenduetan - Euskara

Aintzatespen sozial maila handiagokoak dira mugimenduekin lotura
daukaten unibertsitateko kulturgileak. Alta, adierazi den bezala, gizarteari
begira baliabide sinboliko garrantzitsuagoen jabe diren arren, eskuarki
mendeko lekua daukate unibertsitate esparruan. Hartara, zailtasunak izan
ohi dituzte mugimenduen interes kognitiboak kultura erakunde nagusien
ikerketa eta irakaskuntzaren alor legitimoetan ezartzeko. Aldi berean,
behartuta daude kultura legitimoaren arauak beteko dituen lana egitera.
Horrenbestez, unibertsitate esparruan lan egiteko bizitza akademikoaren
eskariak eta euren konpromiso sozialak eta politikoak bateragarri egiten
ahalegindu behar dute, euren lanaren sinesgarritasun intelektuala bermatu
nahi badute.
Azken kulturgile horiek unibertso akademikoan daukaten egoera
ahula gizarte mugimenduetan metaturiko kapital politikoarekin orekatu
dezakete hainbatetan. Kulturgileek jasotzen duten onespena, jakina, ez
dator beti berdinen aldetik. Orain arte ikusi dugun bezala, zenbait
egoeretan, sozialki irabazitako aintzatespena beste testuinguru instituzional
batzuetan erabili daiteke kapital politiko modura. Azken urteetan,
esaterako, ohikoak izan dira bi norabidetan egindako transferentziak.
Batetik, tradizio akademiko-zientifikotik datozen intelektual kontsakratuek,
kultura kapital indartsua metatu ondoren, agintaritza sinboliko handia
erdietsi dute gizartean. Ondorioz, mugimenduetan parte hartzean, haiei
helarazi diete eskuratutako legitimitatea mugimenduek euren eskariak
zilegi egin ditzaten. Bestetik, gizarte mugimenduen garapenaren ostean
ezagutza esparru berriak integratu dira unibertsitateko ikasketetan eta
ikerkuntza programetan. Beraz, akademiaren barruan “bazterrekoak” ziren
kulturgile eta diziplina akademiko batzuen egoera hobetu egin da,
mugimenduetan irabazitako kapital politikoari esker kontsakratuta geratu
416