kulturgileak gizarte mugimenduetan - Euskara

ezagutaraziz, politikoki pentsa daitekeenaren esparrua zehazten dute eta
errealitate sozialaren irudikapen “zuzenak” zedarritzen dituzte. Bada, iritzi
publiko mediatikoaren ezkutuko funtzioa adostasuna eta gizarte kontrola
bermatzea izan ohi da.
Ildo horretan, masa hedabideen —eta haiekin lotutako indar
politikoen— irizpideak jorratzea eta aktibatzea izaten da intelektual
mediatikoei egotzitako zeregina. Horretarako, “intelektual organikoaren”
egokitzapen garaikide horiek enpresaren eta interes talde jakinen moldeak
eta patroiak eskuratu behar izaten dituzte eta kultura ekoizpenaren arau
autonomoak saihestu. Azken batean, kultura enpresaren barnean nagusi
diren taldeek daukate intelektuala nor den definitzeko ahalmena. Oraingo
honetan, ezagutzaren ekoizpenak ez du kulturgilea intelektual gisa
definitzen, ezta publikoarekiko loturak ere; intelektualak komunikazio
mediatikoaren ehunean lortzen du bere estatutua, egitura horrek bermatzen
baitio esparru publikorako sarbidea. Halatan, oraindino pentsalari bakan
batzuk kultura esparru tradizionaletik etorri arren —akademiatik,
zientziagintzatik, eta abar— gaur egungo gizarteetan intelektual gisa
definitzen diren asko eta asko masa hedabideen benetako emaitza ditugu.
Ortega eta Humanesen ustetan, intelektual berriak kazetariak dira batik bat
(Ortega eta Humanes, 2000).
Ohiko intelektualen legitimitatea kultura esparruko berezko arauen
erabilera trebean datza. Bestela adierazita, ohiko intelektualak berariazko
jakintza legitimoak baliatu behar ditu eta esparruko berdinen onespena
irabazi behar du kontsakrazioa lortzeko. Baina, intelektual mediatikoei
dagokienez, berariazko ezagutzen gabezia edo gainerako intelektualen
onespen eza ez dira lana burutu ahal izateko eragozpenak izaten. Izan ere,
intelektual mediatikoen boterearen funtsa ez dago ezagutza mailan,
271