kulturgileak gizarte mugimenduetan - Euskara

ezagutzaren sortzaile eta eramaile baimenduak finkatu ziren gizartean,
estatus bereizi batekin. Izan ere, ezaugarri erlijiosoa daukan pentsamendu
legitimatzaileak berariazko ezagutzak baliatzen dituzten gizaki jakitunen
premia dakar. Eta horiek gero eta gehiago urruntzen dira jakituria
eskuratzeko pribilegiorik ez daukatenengandik.
1.2. Legitimazio adituen boterea
Gizartearen etengabeko barne bereizketak, lan banaketa ahalbidetzen
duen heinean, ezagutzaren espezializazioa eta ezagutza espezializatua
kudeatzen duten adituak sortzen ditu. Gizartearen etekin ekonomikoak
aukera eman behar du horretarako, noski. Baina, baldintza hori bermatuz
gero, ezarrita geratzen dira gizartearen barne bereizketarako oinarriak.
Horrela, ezagutzaren forma konplexuak sortu ahala, adituek beren
espezialitateko gaietan jarduteko beta gero eta handiagoa izan ohi dute.
Apurka-apurka, mekanismo kontzeptualen garapena bide dela, eguneroko
bizitzako beharrizan pragmatikoetatik aldentzen dira adituok. Halatan,
ezagutza atal landuetan ari diren jakitunek bestelako gizarte estatusa
eskuratzen dute geldi-geldi. Handik gutxira, ez dira ezagutza sozial
multzoaren atal batean edo bestean soilik aditu izaten. Aitzitik, multzo
osoaren gaineko eskumena eskatzen dute, eta, izatez edo nahiez, bederen,
“aditu unibertsal” bihurtzen dira (Berger, Luckmann, 1979: 150). Horrek ez
du esan gura den-dena jakiteko ahaleginetan dabiltzanik, beste guztiek
jakin eta egiten dutenaren esanahia ezagutzea eurentzat hartzen dutela
baizik. Holakoetan, errealitatearen esparru partikularrak lantzen dituzten
beste eragile batzuk egoten diren arren gizartean, adituek euren egokitasuna
aldarrikatzen dute errealitatearen azken definizioak egiterakoan; ondorioz,
botere sinboliko indartsua metatzen dute gizarteko beste kideen aldean.
23