kulturgileak gizarte mugimenduetan - Euskara

4.4. Kulturaren boterea
Ezkutuan mantendutako pribilegioari esker existitzen den arrazoiak
boterearen gehiegizko erabileraren ahalmena gordetzen du beti bere
barnean. Ikusi egin behar da gizarteko zein esparrutan sortzen den arrazoia.
Ez dago zalantzarik. Kulturaren esparruetan lantzen da bereziki arrazoia,
hau da, menderatze lanen banaketan objektiboki nahasirik dauden gizarte
ataletan —ekarri dezagun gogora, adibidez, eskola erakundea—. Arrazoiak
ahalmen benetan berezia dauka, aldi berean kapital kultural eta kapital
sinboliko modura jokatzeko gaitasuna erakusten baitu. Hargatik, etekin
material eta sinbolikoen iturri izan da bere eramaileentzat eta, horrekin
batera, menderatze eta legitimazio tresna gisa erabili izan da gizartean.
Kulturgile modernoak proiektu ilustratuaren burutzapena balio
nagusitzat daukan sistema sozialean kokatzen dira, alegia, giza arrazoia
zabalduz garapena bultzatu gura duen gizartean. Hartara, arrazoiaren
tresnen jabe izanak gainerako botere sozialetatik hurbil jartzen ditu
kulturgileak. Kultura esparrua bereizi ahala, euren gaitasun kulturalen
izenean mundu sozialari buruzko diskurtsoak eta irudikapenak sortzeko
ahalmen legitimoa eskuratu dute kulturgileek, kulturako kide gisa.
Ondorioz, munduaren gain kontzienteki jarduteko gaitasuna onartu zaie.
Kultura gaitasunak eskainitako legitimitatea ezagutza espezifikoetan,
eta sormen literarioa, artistikoa eta antzeko gaitasunetan funtsatu da.
Legitimitate horren arabera gutxiengo kulturalak gizarte mundua sortzeko
bitarteko baliotsuak biltzen eta erabiltzen ditu. Baliabideak kontzentratu
ahala, gutxiengoak geroago eta garrantzi sozial handiagoa eskuratu du,
hainbesterainokoa ezen Modernitatean sortutako beste elite politiko eta
ekonomikoen pareko bilakatu den. Hartara, botereguneetan toki gailena ez
122