kulturgileak gizarte mugimenduetan - Euskara

dute helburu hori erdiesteko, alegia, errealitatearen bestelako interpretazio
markoak eraikitzeko. Baliabide horien artean, gizarte garatuetako lehia
sinbolikoetan premiazkoak diren era guztietako kulturgileak eta kultura
bitartekoak daude.
Mugimenduaren nortasuna —behin-behinekoa betiere— esparruan
parte hartzen duten eta elkarrekintzan dauden eragile eta erakundeen
arteko gatazken eta tentsioen bitartez osatzen da, gune kontzeptual horren
inguruan definizio bat baino gehiago egoten baita lehian maizenetan.
Horrenbestez, mugimenduaren batasuna, lortzen denean, lehia horien
emaitza izan ohi da, alegia, hainbat eragileren arteko behin-behineko
adostasunaren ondorioa. Zenbaitetan, mugimenduan gailentzen den
definizio nagusia besterik ez da publikoki ezagutzen, beste interpretazio
batzuk mugimenduaren barnean isilduta geratzen baitira. Nolanahi ere,
arrakasta daukanean, ideia, pentsamendu eta interpretazio marko berrien
sorrera eta artikulazioaren bitartez definitzen da mugimendua gizartearen
aurrean. Bestalde, ez da ahaztu behar mugimenduan arrakastatsu bilakatu
den errealitate definizioa hala izan dela, behin baino gehiagotan, aukera
politikorako egitura jakin bat (political opportunity structure delakoa)
mesedegarri izan duelako.
Esparruaren kontzeptuak modu egokian uzten digu irudikatzen
jarduera intelektualen eta kulturgileen egoera aniztasuna gizarte
mugimenduen barnean. Alde batetik asimetriak, hierarkiak eta
desberdintasunak jasotzeko aukera ematen du, hartara, “intelektual
elitista”/“ezjakin” eredu bipolarraren eskema murriztaileak ipinitako muga
estuak gainditzeko aukera ere. Bestetik, esparruaren kontzeptuak eragile
guztien arteko harreman konplexuak, gatazkak eta tentsioak behatzeko beta
eskaintzen du. Hartara, mugimenduaren barnean kulturgile bakoitzak
408