kulturgileak gizarte mugimenduetan - Euskara

Harremanen bilbean gertatu daitezkeen aldaketak historiatik oinordetzan
hartutako ahalmenen mende daude: ahalmen horiek zehazten dute une
batean kulturaren esparruan edo azpiesparruetan —unibertsitatean,
zientzigintzan, literaturgintzan, artean, filosofian eta abar— egin litekeena,
baita ezinezkoa dena ere.
Bestelako faktoreek ere baldintzatzen dituzte aldaketak.
Kulturgileen posizioen araberako interesek, esaterako, behin baino
gehiagotan bideratzen dituzte aldaketa horiek kultura esparruaren
egituraren barnean. 44 Azken batean, kulturgileen eta kultura erakundeen
estrategiak esparruaren egituran dauzkaten kokapenei loturik egoten dira.
Bada, esparruaren egiturak, alde batetik, kulturgileen baliabideen banaketa
bereizgarria jasotzen du eta, bestetik, berdinek eta publikoek kultura
sortzaileei emandako aintzatespen maila —instituzionalizatua edo ez
instituzionala— biltzen du. Baldintzapen horiek guztiek orientatzen dituzte
kultura unibertsoek beren kideei eskainitako ahalmenei buruzko
pertzepzioak eta kulturgileek burutu ditzaketen hautaketak. Aukerak bi
muturreko eskema batean laburbildu daitezke: batzuen estrategiak
esparruan indarrean dagoen baliabide banaketa mantentzera zuzendurik
egoten dira, beste batzuenak, aldiz, banaketa hori azpikoz gora jartzera.
Zalantza barik, bertan sartzen direnentzat esparrua aukera gunea da,
hots, ahalmen objektiboen markoa —egin daitekeena mugatzen du—.
Kulturgintzaren esparrurako sarrera, alabaina, jokabide eta adierazpen kode
jakin batzuk eskuratzen direnean lortzen da, ez lehenago. Kode horrek
inposaketen mende dauden askatasunen unibertso mugatua zabaltzen du
(Bourdieu, 1995: 349), kulturaren mundu zehatzaren potentzialtasun
44 Kulturgileen jarduna zuzentzen duten interesak, interes izanda ere, ez dira zentzu
ekonomiko hertsian ulertu behar.
127