kulturgileak gizarte mugimenduetan - Euskara

Eliasen konfigurazioaren ondoan Bourdieuren kontzeptualizazioak badauka
bere aldeko ekarpen garrantzitsu bat: Bourdieuk nahiago du eragileez hitz
egin gizakiez baino. Hartara, Bourdieuren proposamenari jarraituz gero,
gizartean sortutako konfigurazioetan edo esparruetan aktore indibidualez
zein kolektiboez hitz egin dezakegu eragile kontzeptua erabiltzean eta ez
soilik banakoez. Izan ere, Eliasek aktore sozialak gizabanakoekin
identifikatzen ditu eta horrek muga nabarmena ezartzen dio bere
kontzeptuari. Aldiz, eragileez mintzo ahal bagara, uler dezakegu aktoreak
indibidualak nahiz kolektiboak izan daitezkeela, eta libreki zein
hertsapenen mende jardun dezaketela. Bestalde, banakoari dagokionez ere,
eragile kontzeptuak gizarteak sailkatutako eta ezaugarritutako pertsonen
ideia adierazten du, gizaki fisikoarena baino.
Horrenbestez, gizarteko esparru batean gizarteak baldintzaturiko
gizaki kategoriak egon ohi dira harremanetan eta elkarrekintzan, baita
entitate kolektiboak eta erakundeak ere. Ikuspegi hori oso baliagarria da
kulturaren esparrua aztertzeko, bertan, oraindik aurrera ikusiko den bezala,
gizaki kategoria bereziak —kulturgileak— dihardutelako eta, haiekin
batera, kulturgileen “edukiontzi” diren erakundeak: unibertsitateak,
argitaletxeak, ikerkuntza instituzioak eta hedabideak. Horiek guztiek
harremanetan daude eta elkarren arteko eraginean jarduten dute.
Gizabanako soila ezin da, beraz, gure erlaziozko azterketarako abiapuntu
egokia izan.
Esparrua, hemen erabiltzen den zentzuan, gizarte bizitzaren atala da,
historian zehar autonomia eta funtzionamendu bereizia lortu duen arloa,
gizarte harremanen inguruan eta interesen gainean eratuz osatu dena, eta
baliabide propioekin, hau da, beste esparruetan erabilitako baliabideez
bereizten diren errekurtsoekin funtzionatzen duena. Izan ere, gizakiek ez
89