kulturgileak gizarte mugimenduetan - Euskara

Lehenago aipatu diren intelektualaren irudikapen karismatikoak eta
indibidualistak behingoz saihestu ondoren, intelektualak ikuspegi sozialetik
ulertzeko saioari ekiteko aukera ematen du kulturgintza esparruaren
kontzeptuak. Era berean, gizarteko atal modura kulturak daukan
berezitasuna onartzean, esparruaren kontzeptuak beste muturreko
interpretazio batzuk gainditzeko bidea zabaltzen du, hala nola
determinismo sozialak lehenesten dituzten intelektualen irudikapenak. Izan
ere, azken horiek ahaztu egiten dute sarritan kulturaren munduak daukan
izaera espezifikoa. Beraz, intelektualen izaera soziala eta aldi berean
espezifikoa aintzat hartzean, uztartu egiten ditu dimentsio biak kultura
esparruaren nozioak.
Horiek horrela, kultura esparruaren harremanezko ikuspegia
intelektualaren perspektiba positibistari kontrajartzen zaio hasiera
hasieratik. Arestian aztertutako intelektualei buruzko joera positibistak
maiz azaleratu dira errealitatean ebatzi barik dauden auziak zientziaren
arloan erabaki gura izan direnean. Intelektualari buruzko proposamen
normatibo asko izan dira horren lekuko. Planteamendu horren ondorioz,
asmo normatiboarekin sortu dira hainbat eta hainbat definizio, zein baino
zein zehatzagoa intelektualaren kategoriaren muga legitimoak
jartzerakoan. Ordea, kulturgileen harremanezko esparruaren existentzia
hartzen badugu gogoetaren abiaburu ohartzen gara definizio horiek
eztabaidagai direla esparruan bertan. Nor den intelektuala eta nor ez, nork
betetzen dituen “benetan” beharrezko ezaugarriak eta nork ez, nork
ordezkatzen duen une bakoitzean intelektualaren “esentzia” eta nork ez:
kulturaren esparruan etengabe lehian dauden edukiak islatzen dira
eztabaida horietan. Mundu sozialean gizarte errealitatearen inguruko beste
hainbat definizio lehiatzen diren bezalaxe norgehiagokan daude kulturaren
eta kulturgile legitimoen irudikapenak kulturaren mikrokosmosean ere.
94