kulturgileak gizarte mugimenduetan - Euskara

Botere sinbolikoak adierazpen eta maila ugari dauzka kulturaren
esparruan. Gaur egun kultura sortzaileek dituzten ezagutza espezifikoek
haien gizarte indarraren iturrietako bat osatzen dute. Ez da ahaztu behar,
bestalde, edukitzeaz gain, kulturgileek sortu, metatu eta transmititu ere
egiten dituztela ezagutza horiek. “Zientifikotasunaren” estatutoarekin
sozialki onetsitako ezagutza espezializatuak botere sinbolikorik maila
handiena eskuratu duten baliabideak dira gaur egungo gizarteetan.
Baliabide horien eramaileak, hortaz, indar performatiborik eraginkorrena
baliatzen dute gizarte harremanetan.
Ezagutza baten zientifikotasuna gizartean onartutako kualitatea izan
ohi da. Zientifikotasuna ez dator ezagutza jakin baten egiatasunaren
berezko indarretik, egiaren sinestetik baizik. Zientzia, hortaz,
eraginkortasun sinboliko handiko ezagutza mota da, berez soziala den
indarra eskuratzeko eta baliatzeko ahalbidea izan du eta. Horrela, gizarte
modernoetan ezagutza zientifikoa sozialki legitimaturik agertzen zaigu
egiazko ezagutza gisa; eta, ondorioz, errepresentazio sozialen arteko
borroka kognitiboan, zientifiko legez ezaugarritutako —eta onartutako—
irudikapenak, hau da, egiazkotzat azaltzen denak, berezko indar soziala
biltzen du bere barnean. Gizarte munduaz ari garela, zientziak ikuspuntu
legitimoaren monopolioa eta aurrikuspen autoegiaztatzailearen boterea
ematen dizkio hari atxikirik dagoenari —edo itxura hori ematen duenari,
behintzat—. Ildo horretatik, jarduera zientifikoari loturik dauden
kulturgileak baliabide sozialki eraginkorren jabe izaten dira. Zientziaren
esparruan bezala, kulturaren munduan, oro har, gizaki gehienek
kulturgileen esku utzi dituzte ezagutzari eta kulturari lotutako gai
korapilatsu guztiak eta haien boterearen zilegitasuna onartu dute.
183