kulturgileak gizarte mugimenduetan - Euskara

Halatan, jakin dezakegu faltsua zer den; ez, ordea, zer den behin betiko
egia (Popper, 1982: 75-89). Bestalde, hasierako positibismo
ahalguztidunetik geroko zientzia erlatibistagoaren bidean eragin handia
izan zuen, besteak beste, Thomas Kuhnen The Structure of Scientific
Revolutions izeneko lanak (Kuhn, 1980), bertan paradigma edo ikusmolde
nagusi bat partekatzen duen komunitate zientifikoaren emaitza gisa agertu
baitzen zientzia lehendabizikoz. Hartara, planteamendu horretan agertzen
denez, ezagutzaren azterketa guneak aztertzaileen komunitatearen interesen
arabera aldatzen dira, eta ez nahitaez zientziaren “barne interesen” arabera.
Beraz, ezinezkoa da ezagutzaren garapen linealaz eta metaketa sinpleaz
hitz egitea, ezta eragin sozialik ez duen lanketa zientifikoaz ere.
Era horretako ekarpenen ostean, nabarmen geratu zen gero eta
zailtasun handiagoak zeudela ezagutza legitimoa eta ez legitimoa, alegia,
zientifikoa eta ez zientifikoa, zehazteko betiko eta erabateko
baliotasunarekin. Halatan, azken urteotako kultura testuinguruan,
epistemologiak, alde batetik, eta zientziaren soziologiak, bestetik, berretsi
dituzten joera erlatibistak indartu egin dira poliki-poliki, nahiz eta bi
diziplinak jakintza zientifikoaren mugei buruzko arazoak eta aurkikuntzen
sinesgarritasun irizpideak zehazten ahalegintzen diren.
5.1.1.1.1 Fisikaren eredua
Halaz ere, jakintza zientifikoari aplikaturiko sekularizazioaren
kontzeptuak ez gaitu eraman behar, gure ustetan, zientzia sen oneko
ezagutzaren adierazpenekin parekatzera. Ildo horretatik, erlatibismo
hutsean murgiltzea baino emankorrago begitantzen zaigu zientziaren
nolakotasun historikoari erreparatzea, azken finean, zientziaren errealitatea
293