kulturgileak gizarte mugimenduetan - Euskara

Ordun gizarteak eskaera bat planteatu beharko du, gizarte edo, bueno, jende
aurrean esan beharko du zer premiak dauden eta unibertsitateak bizkarra
ematen diola. Eta hori salatu beharko du seguru asko, ezta? Komunidade
akademikoak eta zientifikoak eta bere ahalegina egin beharko du unibertsitate
botere organoek beste planteamendu baterantz bidera dezatela beraien lan
guztia, ezta? Adibidez, orain, sortzear dago Ebaluaketa eta Kalitatearen
Agentzia eta hori. Agentzia horren baitan sortuko diren ebaluaziorako taldeek
planteatzen dituzten irizpideak oso inportanteak izango dira. Eta, bueno, hori ez
da zuzen-zuzenean errektore edo errektore taldearen eraginpeko kontu bat
izango. Hor izendun, itzal handiko pertsonek, akademikoek, hartuko dute parte
talde horietan, eta haiek ezarriko dituzte irizpideak. Ordun, horrek eragin
handia izan dezake unibertsitatearen norabideak gizarterantz jarri daitezen,
ezta? (3. Elkarrizketa).
Oro har, elkarrizketatuen adierazpenei antzematen zaienez,
akademiak euskal gizartearekin daukan etena gainditu ahal izateko bide bat
unibertsitatearen eta euskal kulturako erakundeen arteko harreman
instituzionalak estutzea litzateke. Izan ere, behin eta berriro aipatzen da
unibertsitateek euskal kulturaren eragileekin —hau da, euskalgintzarekin
eta abar— dauzkaten harremanak eta loturak maila pertsonalean garatu
direla, hainbat kulturgile eta akademikoren lanari esker eta ez
unibertsitateen ekimen instituzionalari esker. Hartara, elkarrizketatutako
akademikoek bereizi egiten dute maila pertsonalean euskal kulturaren alde
akademiko askok egindako lan eskerga baina sakabanatua eta
unibertsitateek instituzionalki egin beharrekoa. Azken hori, alegia, Euskal
Herriko unibertsitateek euskal gizartearekin daukaten erantzukizuna,
betetzeke dago oraindik.
Orduan unibertsitatean nik uste dut kulturgintzarekin (…) loturak ez dira.
Instituzio bezala ez dago. Eta inkluso profesionalen aldetik, unibertsitatean
dauden ikerlari eta pertsonen aldetik ez dago, ez dago loturarik. Gero dira
pertsonak eta batzuk gaude hemen, eta beste ez dakit zertan, eta abar. Baina,
oro har hartuta… Orduan, hemen egin dira lanak, hainbat lan egin da, egiten
ari da, baina horiek gero ez dute lotura, ez dute behar bezalako lotura (4.
Elkarrizketa).
Beste gauza ezberdina da pertsonalki. Pertsonalki bai daude akademiarekin
lotzen diren pertsonak, irakasleak, irakasle unibertsitariak, beraiek pertsonalki
650