kulturgileak gizarte mugimenduetan - Euskara

Irudikapen horretan, gizakiek, euren atxikidurak eta elkarloturak direla
medio, dependentzia bilbeak osatu eta, horrela, botere oreka aldakorrak
dauzkaten era askotako konfigurazioak eratzen dituzte: familiak, eskolak,
hiriak, maila sozialak edo estatuak. Halatan, “sistema” kontzeptuarekin
alderatzen badugu, konfigurazioak ez du irudikatzen berezko harmonian
funtzionatzen duen entitate itxiaren ideia. Gatazkaren edo harmoniaren
ideiei dagokienez, kontzeptu neutrala izan nahi du, barnean hartzen baititu
hala harreman adiskidetsuak nola gatazkatsuak. Izatez, interdependentzia
arerioen artean zein adiskideen artean ezartzen da. Tentsioen arteko oreka
multipolarrek askotariko elkarloturak ezaugarritzen dituzte; horiek bereziki
ohikoak dira gizarte bereizietan. Elkarloturen aldaketak modu zehatzagoan
hauteman daitezke epe luzeko denbora tarteetan eta, zenbaitetan, tentsio
oreka tradizionalaren gainbehera eta ondorengo konfigurazioaren sorrera
ere ikusi daitezke ibilbide horretan. 30
3.2.1.2. Esparruaren kontzeptua
P. Bourdieuren “esparru” kontzeptuak antzekotasun handiak dauzka
—eta seguraski zorren bat ere— N. Eliasen planteamendu aitzindariarekin.
Halarik ere, Eliasen proposamenak baino elaborazio finagoa eta osatuagoa
dakar, gure ustetan. Gizakien interakzioak, alde batetik, eta interakzioen
azpian datzan egiturazko errealitatea, bestetik, kontzeptualki bateragarri
egin nahi dituen soziologiako korronte berean kokatzen dira bi autoreak.
30 Konfigurazio kontzeptuaren erabilerak emaitza oparoak dauzka esaterako N. Eliasek
gorteko gizarteari buruz egin zuen azterketa historikoan. Ikus Elias, 1993.
85