kulturgileak gizarte mugimenduetan - Euskara

Esparru zientifikoek —soziologiak zein medikuntzak, biologiak zein
fisikak— etengabe jasotzen dituzte gizarte esparrutik sortutako
iragazpenak. Halaz ere, gizarte zientziak bereziki zaurgarriak dira indar
horien aurrean. Kulturaren esparruan aztergai izaten diren gaien edo
“arazoen” sorrera iturrietako bat estatua bera eta korporazio ekonomikoak
izan ohi dira. Baina ez bakarrak. “Arazo sozialak” gizarteko lehien eta
borroka sinbolikoen testuinguruan eratzen dira apurka-apurka; lehiak
beharrezkoak dira gaiak arazo legitimo gisa —alegia, aitortu, argitaratu,
plazaratu eta ofizialdu egin daitezkeen auzi modura— publikoki
ezagutarazi eta aintzatetsi daitezen gizartean. Sarritan kulturgileek beren
modura onartzen dituzten arazoak aldez aurretiko gizarte-ekoizpen prozesu
baten emaitza izan ohi dira. Gizarte errealitatearen eraikuntza lan horrek
gizarte egintza asko biltzen du atzean: bilerak, batzordeak, elkarteak,
eskariak, proiektuak, egitarauak, diru inbertsioak, azterketak, txostenak,
mobilizazioak, manifestazioak, presio taldeak, gizarte mugimenduak eta
hauteskundeak ere behar izaten dira makina bat gairen definizio publikoak
arrakastatsuak izan daitezen gizartean. 96 Aldez aurretiko gizarte lanak
ahalbidetzen du, beraz, arazo pribatu edo partikular modura gera zitekeena
“gizarte arazo” edo, zenbaitetan, “arazo ofizial” ere bilakatzea —alegia
erabaki ofizialak bultzatzen dituen auzia, legeen bidezko arautzea eskatzen
duen gaia, eta abar— (Larrinaga, 2004).
Horiek horrela, gizarte arazoen eraikuntzak daukan ibilbidean,
nabarmendu nahi dugu esparru politiko eta ekonomikoaren erakunde
96 Pentsa dezagun ekologia eta garapen iraunkorrari lotutako gaiek, bioteknologiarekin
zerikusia daukatenek, gizarte-gutxiengo kultural edo sexualen eskubideei dagozkienek
eta hainbat eta hainbat gai sozialek —drogen kontsumoak, genero menderatzeak, eta
abar— egin duten bidea ikerkuntza agendetan eta jarduera intelektualean txertatu baino
lehenago. Hala ere, gai guztiak ez dira iristen estatutu hori izatera, alegia, “gai legitimo”
eta publiko izatera.
248