kulturgileak gizarte mugimenduetan - Euskara

ekimena zapuztu egin zen. Bestalde, euskal nazionalismoa minoritarioa
izatean, Nafarroako Foru Erkidegoan autonomiaren kudeatzaile politikoek
bultzaturiko instituzionalizazioak ez du inolako alderdi zalantzagarririk
eduki ez politika orokorrean ezta euskarazko kultura politikari ere
dagokionean; argi eta garbi, euskararen eta euskal kulturaren sustapenaren
aurkakoak izan dira.
Halaz ere, bai Autonomia Erkidegoan bai Foru Erkidegoan, indar
politiko kudeatzaileen barne kontraesanetatik baino gehiago euskal
nazionalismoari lotutako zenbait sektore sozialek —euskal gizartean
gutxiengo esanguratsua osatu duten sektoreek, alegia— eraketa
autonomikoaren aurka garaturiko estrategiatik etorri dira desadostasunak.
Aurkaritza horretan funtsatu dira instituzionalizazio autonomikoaren
inguruan —batez ere haren legitimazioan— sortutako gatazka asko.
Gatazka horiek adierazpen politiko nabarmena izan dute nazionalismo
hegemonikoaren eta ezkerreko nazionalismoaren arteko borroka politiko-
sinbolikoan, bigarrenak ez baitzuen onartu frankismo ostean diseinaturiko
euskal lurraldeen banaketa administratiboa eta estatu soberaniatik
delegaturiko eskuduntza-multzo mugatuaren kudeaketa autonomikoa.
Aitzitik, Espainiako marko juridiko berriaren ukazioak eta haren ondorio
den eraketa autonomikoaren aurkako jarrerak ezaugarritu dute ezkerreko
nazionalismoaren ibilbidea frankismo ostean. Bide beretik jo du ETA
erakundeak ere, nahiz eta azken horren jarduerak frankismoaren garaian
baino askoz deslegitimazio sozial handiagoa jaso duen testuinguru politiko
berrian. Oro har, nazionalismo hegemonikoaren eliteek pragmatismoaren
izenean abian jarri zuten instituzionalizazio autonomikoak aurrez aurre
aurkitu du ezkerreko nazionalismoak bultzatu duen marko politikoaren
deslegitimazio saioa.
552