kulturgileak gizarte mugimenduetan - Euskara

erakundeak aztertzen dituenean, alderdi politiko minoritarioa eta bohemia
ere kontuan hartzen ditu, uste baitu instituzio horiek ere kultura erakundeen
antzeko funtzioa bete zutela intelektualen osaketan (Coser, 1968: 23).
Horrela, kultura nagusiaren ikuspegitik desbideratzailetzat jotzen ziren
balioek, politikoki ez zuzenak ziren ideia iraultzaileek eta publiko murritzei
zuzendutako abangoardiako pentsamenduek modu horretako eramaile
instituzionaletan izan zuten toki egokia XIX. mende amaieran eta XX.
mende hasieran. Gune instituzional horiek baliatu zituzten, hartara, hainbat
eta hainbat intelektualek.
Oro har, erakundeek —kultura erakundeek batik bat— askatasun
gunea eman diote kulturgileari. Kulturgilearen lana eta betebeharrak
burutzeko gune erlatiboki autonomoa, hau da, gizartean txertaturikoa baina,
aldi berean, gizartetik bereizia, eskaini dute, zalantzarik gabe. Kultura
erakundeak babeslekuak izan dira. Berdinekin jarduteko harremanezko
espazioak. Komunikaziorako esparruak. Halarik ere, harreman
objektibatuen emaitza diren heinean, kultura erakundeek hertsapen marko
jakin bat ere ezarri diote kulturgileari. Kultura sortzaileak erakunde jakinen
arauen mende jardun du historian zehar, erakundearen helburu eta nahietara
makurturik zenbaitetan. Bi ezaugarriok, askatasuna eta hertsapena, izan
dira kulturaren esparru modernoa progresiboki osatu duten erakundeen
bereizgarriak.
217